أعضاء تحت الاضواء ( 8 ) انت كنت شارى الكمبيوتر وموصل نت ليه

كلنا عندنا كمبيوتر وموصلين نت كمان

ونقعد قدام الكمبيوتر ساعات طويلة جدا ووقت كبير جدا

ولما حد يكلمك او ينادى عليك وانت قدام الجهاز تقوله ماشى وانت مش عارف بتقوله ماشى على ايه

ولو جينا ندور انت مشغول فى ايه هنلاقيك مشغول فى حاجات مش مستاهلة انك تقوله ماشى كده وخلاص

يعنى ممكن مثلا نلاقيك بتنزل اغانى ونغمات رمضان او شوية صور وثيمات اسلاميات عشان تحطهم عالحتة ال73 بتاعتك

او عمال تشيت عالياهو او الفيس مع واحد صاحبك وعمال تقطعوا فى صاحبكوا التالت

وممكن كمان لو انت حد مراقبك يلاقيك قاعد قدام الجهاز ونايم على روحك من الضحك ويقول عليك اتجنيت ولا حاجة

ما علينا من ده كله

ناس كتير بتضيع وقت كبير جدا قدام الكمبيوتر والنت يعنى ممكن مثلا تقعد قدام الجهاز 3 او 4 ساعات وتيجى تشوف ايه المحصلة

او ايه اللى انت طلعت بيه بعد القعدة الطويلة دى تلاقى ولا حاجة طيب وقتك ده مش محسوب عليك ولا انت كنت جايب الجهاز ده عشان ايامك ووقتك يعدوا وخلاص

ومادام كده كده بيعدوا ما تخليهم يعدوا فى حاجة تنفعك

واحد هيقولى يعنى انت عاوزنا نعمل ايه يعنى يا عم اسامة قولى كده

معلهش بقى انا هخليك انت اللى تجاوب عالسؤال بنفسك او انا هجاوب على سؤالك بسؤال واقولك

انت كنت شارى الكميوتر بتاعك ليه

والسؤال الافظع انت كنت موصل نت ليه ؟

ياريت اشوف اجابات منكم

زى مانا هشوف من ضيف حلقة النهاردة

الاستاذ احمد شتيوى اللى بنرحب بيه وبنقوله كل سنة وانت طيب يا ابو حميد ورمضان كريم

وقبل ما تقول رأيك فى كلامى اللى انا قلتله

اسمحلى اقول لكل واحد بيقرأ الموضوع ده الوقتى

اننا عملنا البرنامج ده وخليناه بالعامية عشان كل واحد يعبر عن رأيه بكل صراحة ومن غير خوف او تردد

فياريت تشاركنا برأيك او وجهة نظرك

فسيادتك ليه بقى تبخل على نفسك وعلينا باراءك دى

يا عم علق ولو تعليق بسيط

اتفضل يا ابوحميد المايك مع سيادتك يا باشا

حبيبى ياسمسم
طب اهم حاجة قول للى ف غرفة التحكم يظبط الصوت
ويخلى فيه صدى صوت
الو .. ايوة .. تؤ تؤ تؤ
ايوة كدا تمام
ههههههه

والله ليك وحشه ياسمسم
اخبارك ؟؟
واخبار رمضان معاك اى
اكيد ما ف روحانيات هنا زى البلد
ع العموم ربنا يسهلها ونرجع ونكون مع بعض ف رمضان الجاى ان شاء الله
ونشوف روحانيات رمضان ف بلدنا
ورا احمد نجم
*****
يلا ندخل ف الموضوع
*****

بالنسبة انا اشتريت الجهاز ليه ؟؟

والله اللى اشترى الجهاز
كان المهندس جمال نبيه الله يرحمه وكان معانا ابو اكرم والاستاذ صلاح سلامة
كان وانا ف اولى ثانوى او اجازة تالته اعدادى على ما اعتقد كان ف سنة 2000 م
وكنا لسه ما نسمعش عن الكمبيوترات ف الوقت دا
او كنا نسمع وكان قليل جدا
عشان كدا انا اما اشتريته ما كانش ف هدف لانى يعتبر كنت لسه ما تعمقتش ف المجال دا
ولا حتى كان ف حد يساعد او يشجع الواحد على استخداماته
لكن الهدف ما كنش عندى كان عند والدى اطال الله عمره
وسال قبل ما نشتريه المهندس جمال وفعلا المهندس جمال هو اللى شجعنى انى ادخل ف المجال دا
وكان هدفى انى اكون مهندس حاسب الى .. لانى اعشق الكمبيوتر واللى حببنى فيه المهندس جمال الله يرحمه

واعطانى شوية نصائح .. مشيت عليها والحمد لله
وبعد ما اشترينا الجهاز ب اسبوع فكيت الجهاز حته حته
لانى كان ف بالى انى هاعرف اى حاجة ف الكمبيوتر
لكن طبعا زى ما احنا عارفين
ان الكمبيوتر مجالاته كتيييييييير ولواحده علم لا ينتهى
--------------------------------------------

والله النت دا بقى كان موال
يعنى .. انا ف البداية كنت باستخدم النت من التليفون الارضى
قبل ما الوصلات تظهر وقبل ال دى اس ال
وكنت مقتصر على انى افتح جوجل واقرا اخبار
اكتر من كدا لا ....
بس انا اقولك انا وصلت نت ليه وحبيته ليه ؟
وصلته لان الجهاز من غير النت ما له اى لازمة
واى حاجة بدك فيها تلاقيها موجوده
وبالذات المهتم بانه كل شويه يعرف الجديد
من برامج او اخبار او اى شئ

--------------------------------------------
ومن حبى ف الكمبيوتر بدأت احاول ادخل ف المجال دا جامد
وخاصة اما لقيت ان دراستى ما لهاش اى علاقة بالكمبيوتر
وطبعا اما فتحنا السيبربعد ما اشتريت الجهاز بحوالى 5 سنين ..
كانت اكبر خطوة لاكتساب الخبرة ف مجال الكمبيوتر والشبكات
لكن زى ما احنا عارفين ان البلد صغيرة وما تشجع

الواحد من هنا بدا يهتم انه يدخل نت كتير عشان يعرف اكتر وينزل البرامج الجديدة

وبعدها قررت انى ادخل معهد حاسب الى لمدة عامين
وبردوا زود الواحد بخبرة ساعدتنى ف شغلى هنا ف السفر
--------------------------------------------
النت دا مشكلة
بياخد الوقت جاااااااامد
وبيسلى الواحد
وبيفيد كتيييييير
واللى ما يعرفش يستفيد من الكمبيوتر والانترنت ..
يبقى ما يعرفش يستغل اى حاجة ويستفيد منها..
.............
ممكن تكون شغال ع الجهاز والنت وفجاة تلاقى الوقت مر بسرعة
وانا من النوع اللى لو حد كلمنى وانا شغال ع الجهاز
ممكن اتكلم اى كلام .. وارد اى رد .. لو اندمجت مع الحاجة اللى انا شغال فيها

وممكن تقعد ساعات وبتهيالك انك ما استفدش بحاجة
بس اكيد استفدت وانت مش اخد بالك .. ع الاقل لو انت بتشيت مع واحد صاحبك
وبعد الشات تقول انا استفدت اى .. وتقول لا انا ما استفدش حاجة
لا ع الاقل انك كنت بتستخدم الكتابة .. وايديك اخدت على لوحة المفاتيح اكتر من الاول ولو بنسبة غير ملحوظة

--------------------------------------------

انا شايف ان الوالد قبل ما يشترى الجهاز لابنه
لازم ياخد باله ويكون عارف سلوك ابنه لان الكمبيوتر والانترنت
سلاح ذو حدين

كلام رائع يا شتيوى

وحلقة اكثر من رائعة يا سمسم

الحمد لله
انا لسه ما اشتريت جهاز كمبيوتر ولا اشتركت ف النت

ههههههههههههههههههههههه

طبعا في مصر

الكمبيوتر نعمة ونقمة كما تستخدمها

وارجو من كل اب واخ ان ياخذ باله من اولاده واخوته والا يترك الطفل او الشخص لوحده ساعات طويلة امام الجهاز او ف غرفته الخاصة

وهذا حرصا علي الجميع

واتمني ايضا ان يكون هناك تدريب خاص للشباب واولياء الامور في المعرفة الجيدة للكمبيوتر وان الكمبيوتر ليس للالعاب والشات فقط

با لكل برامج الاحتلاافية للميكروسوفت

ولا ننسي ان مخترع الويندز شاب وهو ف الثانوية العامة

كل الشكر

في انتظار ضيوفك وموضوعاتك رمضان اشرف علي الرحيل

اي خدمة يا باشا

أعضاء تحت الاضواء ( 8 ) انت كنت شارى الكمبيوتر وموصل نت ليه 916386

أعضاء تحت الاضواء ( 8 ) انت كنت شارى الكمبيوتر وموصل نت ليه 839800

أعضاء تحت الاضواء ( 8 ) انت كنت شارى الكمبيوتر وموصل نت ليه 824469

» أعضاء تحت الاضواء ( 4 )انا كنت مع الثورة من اول يوم
» أعضاء تحت الاضواء ( 7 ) على فين يا محروسة
» أعضاء تحت الاضواء ( 2 ) ذكرياتنا فى رمضان
» أعضاء تحت الاضواء ( 3 ) رمضان مبارك
» أعضاء تحت الاضواء ( 1 ) كل سنة وانتو طيبين

فعـاليات يوم الوفـــــاء بالجوابــــــر

أعضاء تحت الاضواء ( 8 ) انت كنت شارى الكمبيوتر وموصل نت ليه