أعضاء تحت الاضواء ( 2 ) ذكرياتنا فى رمضان

طبعا احنا لسه فى اول رمضان وقلنا نبدأ معاكو بحاجة خفيفة كده

يعنى ايه ذكرياتنا فى رمضان

او ما تسمع ذكرياتنا فى رمضان ايه ممكن يجى فى بالك

يعنى كل حاجة حلوة

يعنى الروحانيات

يعنى مثلا كل عام وانتو طيبين تسمعها طول الشهر با ستمرار

وبعودة الايام

والزينة بالعجينة

والفوانيس فى الشوارع والبمبم والديناميت

ودورات رمضانية ومسابقات ثقافية ومسابقات قراُن

والف ليلة وليلة والكاميرا الخفية وادينى عقلك

وبوجى وطمطم لغاية بكار

والعشر الاواخر وليلة القدر

طبعا فى ذكريات كتيرة خاصة بيا انا شخصيا لكن نترك المساحة لضيفنا النهاردة الغنى عن التعريف وبدون اى مقدمات

المدير العام للمنتدى محمد رفعت

كل سنة وانت طيب يا سيادة المدير وبعودة الايام

بمناسبة رمضان اولا

ثم كل سنة وانت طيب بمناسبة عيد ميلادك اليوم

[ندعوك للتسجيل في المنتدى أو التعريف بنفسك لمعاينة هذه الصورة]

سيادة المدير ندخل فى الموضوع على طول

ونبدأ بسؤالنا الاول وهو لما نقول ذكرياتنا فى رمضان ايه بيجى على بالك وبتحس بايه

سيادة المدير امتى اول مرة صمت يوم كامل

وهل كنت مقتنع فى طفولتك بانك تصوم للظهر ههههههههه

هل جيت فى مرة كده وشربت وانت فاكر وعملت انك كنت ناسى

هل رمضان الايام دى زى زمان ولا فيه تغيير وهل التغيير ده كبير بين زمان والوقتى

ايه رأيك التلفزيون الوقتى ولا زمان

هل كنت بتنام وتقوم تتسحر ولا كنت بتفضل صاحى للسحور

سيادة المدير الاضواء فوق سيادتك والميكرفون معاك

اتفضل يا باشا وعيـــــــــــــــــــــــــش وعيشنا معاك

وكل سنة وانت طيب يا غالـــــــــــــــــــــــــــــــــــــى

ومستنيين ذكريات الاعضاء وياريت اللى فاكر حاجة من الذكريات الجميلة دى يفكرنا معاه

بسم الله الرحمن الرحيم

أكيد كل واحد فينا يا أسامة عنده ذكريات وخصوصا أيام الطفولة وجميع مراحل العمر
وفى شهر رمضان بيكون له ذكريات خاصة وحسابات خاصة
زمان كنا بنفضل نحسب لرمضان لسه عليه كام شهر قبلها بتلت أربع شهور ونفضل نستنى رمضان

لكن دلوقتى أول ما برجع بذاكرتى لذكرياتى مع رمضان أول حاجة أفتكرها طبعا والدى الله يرحمه اللى أتعلمت منه حاجات كتير أوى ربنا يرحمه يارب ويغفر له ويجمعنى معاه فى الجنة

طبعا زى أى بيت قبل رمضان بيومين تلانة بيشتروا الحاجات بتاعة رمضان
تمر هندى وقمر الدين وبلح و لزوم المطبخ طول الشهر وكده

وغير كده بقا ليلة الرؤية . يااااااااااه كنا نستنى المفتى الشيخ محمد سيد طنطاوى رحمه الله ييجى يفضل يتكلم كتير اوى والآخر يقول غدا هو المتمم لشهر شعبان وطبعا بنكون مجهزين الزينة بقا كلنا الشلة بتاعتنا اللى موجودة فى الشارع
ونعمل فوانيس زينة ونفضل نعلق فيها والآخر الهوا يقطعها بالليل أو بركات ييجى يقطعها بالعصاية وهو ماشى ....
مش عارف ليه ؟
وطبعا كل بيت كان بيعلق فانوس كبير
وكان زمان تحس ان فى بركة كده فى كل حاجة
كانت الناس تخاف على بعض وكان البيت اللى يعمل صنف حلويات يبعت منه طبق صغير كده للجيران
وتلاقى طبق رز بلبن جاى من هنا على مش عارف إيه جاى من هناك
وغير كده واحنا فى المدرسة كان اليوم بيبقى قصير والحصص وقتها قصير والفسحة كمان
ولما أروح البيت كان أبويا ييجى م الشغل وجايب معاه شوية حاجات كنافة على لحمة على خضار
وكان بييجى فى التليفزيون عمو فؤاد والشيخ الشعراوى
والدكتور نوفل .. وكان فيه برنامج إسمه مرفوض وقابل للتعديل
ووقت الفطار بقا بوجى وطمطم وفطوطة وحاجات تانية كده نسيتها لو حد فاكر يفكرنى
دا غير المسلسلات اللى كان ليها طعم تانى غير دلوقتى وألف ليلة وليلة وفوازير نيللى وشيريهان
وبرنامج ياتليفزيون يا والكاريكاتير المشهور رمسيس
وكل ده وأنت يتتفرج وجمبك التسالى بتاعتك
كنافة او قطايف او كيس بلح
أحيانا بقا كنت أحس ان انا عاوز انام ع الساعة 2 بالليل
أروح ساحب نفسى كده وأدخل أنام
بس على مين واللى ما كانوا بيسيبونى
يفضلوا يصحوا فيا وأنا عامل فيها ميت بس ف الآخر بصحى برضو وأتسحر دا وأنا فى الإبتدائى والإعدادى بس ف الثانوى يعنى كنت بفضل صاحى للسحور

أول مرة صمت فيها يوم كامل كانت وانا فى تانية إبتدائى تقريبا
كنت الأول شغال بالتقسيط
مرة لغاية الضهر .. ومرة أكمل للعصر وبعد العصر أحس بالجوع
لكن عمرى ما قلت أشرب وأعمل ناسى آه لو حسيت بالعطش أو الجوع كنت بتعامل على طول
دى ذكرياتى كده لى قد ما انا فاكر
هفتكر وأقولك الباقى لما أصحى
تصبحوا على خير

طبعا رمضان السنه دى يختلف عن اى رمضان ليه فى رمضان اللى فات كان فيه بعض الشباب بيجرى ورا بركات بالليل ويرعبوه وهوا ماشى يسحر الوقتى بركات اعتزل المهنه ..كنا نكون بنصلى التراويح وتسمع الديناميت بيضرب وزى ما يكون فيه حرب شغاله دالوقتى الناس عقلت شويه ..فى الرمضانات اللى فاتت كنت تحس ان الناس تتسابق الى الخير كل متقابل شخص يسالك قرات كام جزء انا لازم اختم النهارده انا لازم اختم قبلك دالوقتى مفيش خالص بالعكس الناس اللى كانت بتسبقك كل سنه السنه دى مفيش خالص ..كل سنه كنا بنصلى التراويح ورا شيوخ كتير بس السنه دى بنصلى ورا شخص صوته جميل جدا والناس كلها بتحبه جدا..

شكرا لك يا سمسم على اختيارك للموضوع دا ورمضان كريم

[ندعوك للتسجيل في المنتدى أو التعريف بنفسك لمعاينة هذه الصورة]

قشطة عليك يا كبير

شكلها هتبقى سلسلة جامده جدا يا سمسم

وكلام أكثر من رائع يا حماده

والله هتولع

خلى المدير موجود طول الشهر ياسمسم

ليه بس كده ياأحمد دا انا جايب لك بركات
أهو

بركات .... حصرى .... على التليفزيون المصرى

[ندعوك للتسجيل في المنتدى أو التعريف بنفسك لمعاينة هذا الرابط]

السلام عليكم ورحمة الله وبركاته

انا بقي رمضان معايا مختلف جدا لاختلاف الاماكن اللي عشته فيها

كنا عند حي القديم بميت سلسيل نلعب بعد التراويح العاب عجيبة
شندر او منا منا مين
ونصنع الفوانيس الخشب والزينة

وايضا عندما اتيت الجوابر كنا نلعب واتذكر مرة محمد خليل استخبي ف النعش اللي بالجامع الكبير لحد الصبح نام وهو بيلعب

اه
زكريات كتير
وافتكر رمضان بالجيش اول يوم ف رمضان الكل بكي ولم يفطر

لكن اهم شيء كان ف رمضان هو الحب اللي كان موجود بين الناس

والبركة

يعني الجيران كانوا بيتهادوا ف رمضان كل شيء

طبق يلف وكل مرة بصنف

ربنا يبارك فيكم
ويتم عليكم بركته وهداه

والله وحشنا بركات

هاعملها نغمة جوال يااستاذ محمد
هههههههههه

وانا بقى ف رمضان
مش فاكر انا صمت امته
واول مرة انا صمت فيها كان والدى موجود ف البلد
وفاكر انه جاب لى نص جنيه
كان النص جنيه يعنى حاجة

وطول ما والدى ف البلد كان ياخدنى معاه مسجد الانوار من بعد الفطار على طول
نفطر .. نصلى المغرب ف البيت .. نروح المسجد على طول .. لغاية ما نصلى القيام
والواحد كان بده يشوف الفوازير والمسلسلات ويقول
انا نفسى اشوفهم .. بس الواحد وكانه محكوم عليه
كنا صغيرين بقى ممكن ف الابتدائى
ف الاعدادى كنا نصلى ف السلام وكانت المجموعة اللى موجوده كانت تشجع الواحد

رمضان مع الاهل غير
اول رمضان انا قضيته بعيد عن الاهل
كنت ف الجامعة .. وكنت ساكن مع طلبه من البلد وطلبه من الكفر الجديد
وناس محترمة وساكنين ف التجمع الاول
يعنى يبعد عن الحى السادس او الجامعة فى ما يقرب من الساعة
وحظنا اول يوم ف السكن اول يوم رمضان
وحظنا الحلو ان اللى كان عليه يومها الفطار بيعرف يطبخ اوى
وطبخه زى العسل
الاذان اذن .. ولسه الفطار ما خلصش
والحمد لله ان صاحبنا اللى كان عليه تجهيز الفطار خلص
المهم .. اول ما الاكل جه .. والواحد دموعه بدأت تنزل .0. ههههه من منظر الاكل
وصاحبنا الطباخ الماهر.. عامل لنا فراخ و ارز عمرى ف حياتى ما اكلته ويارب ما اكله
الواحد صايم .. .. وبدانا أكل ممكن بين المغرب والعشا
والحمد لله اليوم دا عدا على خير
دا اول يوم ليا افطر فيه بعيد عن الاهل
بعد كدا دخلت مدينة ف نص رمضان .. والحمد لله رحمتنى من احلى طباخ شوفته

رمضان دا بردوا جديد من نوعه
كنا ف الجامعة ممكن نفطر 10ايام بعيد عن الاهل

الوقتى خلاص ولا حتى يوم مع الاهل
والحمد لله ماشية
شوية الاقى صاحبى دا يتصل يقولى الارز بيتعمل ازاى .. هههههههههه
وربنا يعديها على خير

» أعضاء تحت الاضواء ( 3 ) رمضان مبارك
» أعضاء تحت الاضواء ( 4 )انا كنت مع الثورة من اول يوم
» أعضاء تحت الاضواء ( 7 ) على فين يا محروسة
» أعضاء تحت الاضواء ( 6 ) روح الثورة فى الجوابر
» أعضاء تحت الاضواء ( 1 ) كل سنة وانتو طيبين

فعـاليات يوم الوفـــــاء بالجوابــــــر

أعضاء تحت الاضواء ( 2 ) ذكرياتنا فى رمضان