أعضاء تحت الاضواء ( 7 ) على فين يا محروسة

كنت فين يوم تنحى مبارك وايه كان رد فعلك

فيه اللى عيط وفيه اللى وهم نفسه وزقطط واللى كان مبهور وفرحان واللى خايف واللى مصدوم ومش واثق فى الجيش واللى قال يعنى ايه المجلس العسكرى يتولى امور البلاد

واللى قال يلا كده احسن خلى الناس ترتاح بقى

وحصل انفلات امنى ومن ناحية تانية ان معدل الجريمة زاد

واللى قالوا احنا اسفين يا كبير

ومبارك عمل كتير وليه انجازات طيب ايه انجازاته الضربة الجوية ومترو الانفاق وترعة السلام ومشروع توشكى ونزل التحرير وشارك فى ثورة 25 يناير وكان مع الثورة من اول يوم

الراجل ليه انجازات اه لكن مساوئه تغطى على اى انجازات العبارات اللى غرقت والبطالة والفساد والفقر وكل الكلام اللى كان فى كل خطبه بيقول انه هيقضى عليهم او هيسعى من اجل القضاء

وبقت القضيه الرئيسية الثورة بتاعت مين و مين الي يتكلم الكبار ولا الشباب

وظهر ناس تانية

وكام خمسة ستة كده اول مرة نشوفهم بدءا بتنططوا فى كل حتة

والعيشه غليت والحكومه في الضياع ومفيش جديد

والشعب على الفيس

وكله شغل نفسه بالسياسة

ياترى على فين يا محروسة واخرة الكلام ده كله ايه

انا نفسى اغمض عينى وافتحها والاقينا حطينا رجلينا على اول الطريق

ارحب بضيفنا الكبير الاستاذ احمد نجم

اللى وحشنى صوته وكنت اتمنى انى اكون موجود فى رمضان السنة دى

عشان اصلى وراه فى المسجد الكبير واكيد السماعات الجديدة عاملة شغل

لكن لما تسمع الصوت وتحسه حاجة تانية

وانا جايلى شكوى انه بيطول وانا بقوله طول على قد ما تقدر واللى مش عاجبه يروح يصلى فى كندا

اهلا بيك يا ابو حميد وكل سنة وانت طيب

واسمحلى ابدأ باسئلتى واقولك

لحظة تنحى مبارك كنت انت فين

وايه كان شعورك وكنت شايف المستقبل من غير مبارك ازاى

وايه رأيك فى كل الكلام اللى انا قلته ده

هل انت متابع الثورة والاخبار باستمرار ولا بتريح دماغك من الموضوع ده شوية لان الكلام عن الثورة زاد عن حده

ياترى مصر رايحة على فين

بتحلم بايه لمصر

انا حاسس بالناس واكيد زهقتوا من الثورة والكلام عنها

وان شاء الله نغير الموضوع ده بكرة

ويبقى لسه لينا حلقتين عن الثورة او السياسة بصفة عامة

حلقة عن الاعلام المصرى وبرامج التوك شو الى جانب توك شو الاعلام الرياضى

وحلقة عن الاخوان المسلمين وهل انت مع ام ضدد الدولة الدينية

طبعا كل حلقة فى دول عاوزة اسابيع لكن انا بختصر على قد ما اقدر

وفيه مواضيع تانية ممكن نتكلم فيها لو كان فيه ليها وقت فى الاخر

ازيك ياسمسم

واحشنى والله

كل سنة وانت طيب

ندخل ف الموضوع على طول

والله أنا ما بقيتش أحب أتكلم فى موضوع الثورة دا خالص لكن عشان خاطرك نتكلم

كنا بنتكلم عشان خاطر واحد صاحبنا بيحب الريس واحنا بنحب نضايقة بس هو جامد يعنى مش بيقتنع كأن الريس دا كان ولى أمره
دا حتى ماكانش يعرف ان سيدنا يوسف هو اللى طلب يدخل السجن

ما علينا

الحمد لله ياعم لحد دالوقتى ع اللى احنا فيه

حاجة كانت حلم ومستحيل يتحقق لكن لما ربنا بيريد والله لو حصل ايه لا راد لقضاء الله

دا كبيرة أوى ان الباشا بتاعنا أخيرا زهق مننا ومن تعبنا قفقام سابنا

عمل خير والله صاحب الانجازات اللى انت بتقول عليها
وأنا فى رأيى الشخصى مش بحسبها ليه انجازات

يافرحتى بانجازات فى الاخر تتنسب لشخص واحد مش لمصر
والفرحة الكبيرة بقى ان هو بيعمل انجازات والشعب جعان وش لاقى ياكل فول

ياعم سيب الواحد عاين اللى جواه أحسن وأجاوبلك ع الاسئلة

ههههههههههههههههههههههههه

************************

لحظة تنحى مبارك كنت انت فين

قبلها بساعات رحنا لعبنا كورة وكأن مافى حاجة وسمعنا ان الكبير هيقول خطاب تالت ولا باين رابع والساعة 12 الا ربع بالتحديد ليه مش عارف

ولقينا البلد فضيت من 11ونص وكله رايح يسمع

دا طبعا بعد خطاب الأستعطاف والغلبنة والشحاتة للكرسى وجت موقعة الجمل وعكعكت ع الخطاب وبينت للناس ان الخطاب كان فشنك

المههم يومها كنت فى البيت وماكانش عندى أمل خااااااالص فى التنحى لحد ماسمعت عمر سليمان وماكنتش مصدق برده لحد مالقيت الجيش نزل قلت بس هى دى وفرحت جدا وف نفس الوقت قلقت من الانفلات الامنى الله انت قلت عليه
والله الشيخ كان بيتكلم امبارح فى الانفلات الأمنى وقال ان الناس بس مابقاش عندها وعى ايمانى مش أكتر

لكن مع وجود ريس جديد للبلد كله هيبدأيرجع لطبيعته تانى ان شاء الله

كان رد فعلى كنت فرحان جدا
أنا أصلا الريس دا عمره مانفعنى ف أى حاجة بالعكس دا يمكن ظلمنى أنا شخصيا وانت عارف حتى لو ماكانش ليه يد فى الموضوع أقله ان دا ازاى يكون مسؤل عن شعب مايعرفش عنه حاجة
مع ان سيدنا عمر خاف يتسأل عن بغلة
انما الريس ولا كان فى دماغه طالما واصله انها زبادى فى الخلاط
لأ وبيقولك أنكرها جميعا

يبقى احنا اللى عملناها

**********************

وايه كان شعورك وكنت شايف المستقبل من غير مبارك ازاى
بصراحة
أنا ما كنتش شايف مستقبل خالص مع مبارك ودا طبعا كان بيخلينى مش بفكر فى مستقبل من غيره
لكن المستقبل اللى جاى ان شاء الله أنا متفائل ليه خير

وربنا يسهل

******************
وايه رأيك فى كل الكلام اللى انا قلته ده

بالنسبة لموضوع التنحى طبعا كان فيه اللى زعلان واللى بيعيط واللى فرحان وبيزقطط

لكن انا كنت فرحان بحرص شوية

انما موضوع الانجازات دى أنا مش مقتنع بيها دا حتى كان فيه واحد من يومين بيتكلم عن الضربة الجوية قالك ان الضربة كانت أكتر من 100 طيارة ليعنى عمنا ماكانش لواحده

ههههههههههههههههههههههههههه
ولسه

وحصل انفلات امنى ومن ناحية تانية ان معدل الجريمة زاد
دا طبيعى وهيزول والله لما بس الشرطة تاخد وضعها شوية ودا اللى بدأيحصل حتى فى بلدنا بدأوا ينخربوا ورا كام واحد واخدوا شوية من البلاد التانية

واللى قالوا احنا اسفين يا كبير
الكبير خلاص مابقاش كبير
وأنا مش عارف أسفين على ايه

عفوا سيادة الرئيس لست اسف عليك ولكن اسف على اجيال شربت
من فسادك

سيادة الرئيس
.....
لم أنس 1400 مصرى شهداء
العبارة السلام 98
لم أنس شهداء العبارة سالم
اكسبريس
لم أنس 400 مصرى شهداء قطار
الصعيد
لم أنس شهداء حوادث قطارات
العياط
لم أنس كارثة الدويقة
لم أنس تفجير هيلتون طابا
لم أنس طائرة البطوطى
والغدر بقيادات الجيش عليها
لم أنس حوادث الطرق اليومية
والاف الضحايا بلا تعويض
لم أنس فساد اغلب وزارات
وقطاعات الحكومة من شرطة واعلام وثقافة واسكان ونقل
لم أنس الرشاوي والفساد
الاداري لاجهزة الدولة نتيجة لضعف المرتبات
لم أنس عدم محاسبة اي فاسد
تفوح رائحته والاكتفاء بتغيير منصبه
لم أنس خصخصة شركات القطاع
العام وسرقة اموالها
لم أنس الضرايب العمال على
بطال تحت عدة مسميات
لم أنس الضريبة
العقاريةواموال التأمينات التي ضاعت في بورصات امريكا
لم أنس تدمير التعليم وتعين
طبيب اطفال بدرجة وزير تعليم
لم أنس واردات قناة السويس
التى تذهب اليكم مباشرا"

لم أنس تردي الخدمة الصحية
لم أنس العلاج على نفقة
الدولة لغير مستحقية
لم أنس سرقة اراضي الدولة
ونهبها
لم أنس تقسيم اراضي سيناء
لعدد من رجال الاعمال وتهميش الشعب الذي هو السبب في رجوعها الي مصر
لم أنس اهمال اهل الصعيد
لم أنس ضياع الطبقة الوسطي
التي هي عماد اي بلد محترم
لم أنس مشروع توشكي وضياع
المليارات فى الهواء
لم أنس اهمال العلااقات مع
دول حوض النيل مما ادي الي قيامهم بتهديد مصر بمنع مياه النيل
لم أنس تقسيم السودان وتدخل
اسرائيل الواضح في القضية وغياب دور المخابرات المصرية والتي يبدو انها كانت نائمة
لم أنس حصار غزة
لم أنس دعم الامريكان لضرب
العراق
لم أنس بيع الغازالمصرى
لإسرائيل اجمالا" و تفصيلا"
لم أنس هجرة الشباب وغرقهم
في البحر المتوسط وامتهان كرامة المصريين في الدول العربية
لم أنس شهداء التعذيب
لم أنس المعتقلات السياسية

لست أبي
أبي رجل محترم
أبي لا يهين كرامتي .... لا
يقتلني ...... لا يطلق علي الرصاص
سيادة الدكتاتور ........
لست رمزا لنا
كرامتك لا تهمنا .....
تهمنا كرامة الشعب
حياتك لا تهمنا ..... تهمنا
حياة الشعب
ليس معنى انك شاركت بالمخطط الموضوع
منذ ايام الراحل عبد الناصر لحرب 73 انها تكتب بأسمك وتكون انت البطل الاوحد للحرب
.......انت لم تخترع الضربة الجوية الاف غيرك شاركوا بهذة الحرب المجيدة وماتوا من اجل وطن حر ليس من اجل ان تكتب بأسمائهم ضربات
جوية او عمليات حربية

سيادة الرئيس

وجودك لم يكن مهم لاستقرار
البلد لانك فقد شرعيتك
قيادة شعـب مصر العظيم شـرف
لم تكن تسـتحقه

سيادة الرئيس

كما تدين تدان هذا هو منطق
الحياة و طبيعتها

( على فكرة دى واحد نزلها ع الفيس بوك ودى مش كلها دا فيه مصايب تانية أنيل )
وقال ايه انجازات

***********************
هل انت متابع الثورة والاخبار باستمرار ولا بتريح دماغك من الموضوع ده شوية لان الكلام عن الثورة زاد عن حده
ما بقيتش أتابع حاجة خالص غير الحاجات المهمة

************************

ياترى مصر رايحة على فين
هتروح فين يعنى
هههههههههههههه
أهى موجودة دا احنا اللى هنروح

أنا بهزر ياعم

والله انا شايف مصر رايحة ع الصح ان شاء الله بس بالصبر وكل واحد يشوف حاله ومصلحته وما يقعدش يفتى ويتكلم أكتر ما بياكل
كل واحد فى مجاله يعمل ويخلص فى العمل
والجاى أحسن وانا والله متفائل جدا

*************************

بتحلم بايه لمصر

هو حلم واحد وبعده هتتحقق كل الأحلام ان شاء الله

بحلم برئيس يكون عارف كل حاجة عن سيدنا عمر

مش هقولك زيه بس يعرف عنه

وبعدها هيخلى مصر لفووووووووووق أوى بجد

********************

أخيرا بجد أنا مفتقدك فى التراويح
كل ما أبص ورايا بعد الصلاة مش بلاقيك
انت واتنين حبايبنا كدا
وأنا حاسس ان الشكوى جاية من الأستاذ محمد
ههههههههههههههههه

بس أنا والله مش بطول ولا حاجة

يارب أكون ضيف خفيف عليكو

وأسف للأطالة
كل سنة وانتو طيبين
رمضان كريم

بعد ازنك ياحمد يا نجم اعمل كوبى للموضوع واحفظه عندى على الجهاز

[ندعوك للتسجيل في المنتدى أو التعريف بنفسك لمعاينة هذه الصورة]

كلام جميل يانجم
وربنا يعينك يارب
ويكون مستقبلنا افضل مع الرئيس القادم ان شاء الله

----------------------

انا بكون عند ابو اكرم كل خميس وجمعة
وبنصلى العشاء والقيام ف مسجد مستشفى اسمها السعودى الالمانى
الامام دكتور وشاب مصرى
وبسم الله ما شاء الله عليه
حافظ للقران .. صوته جميل .. بفتكرك دايما وانا بصلى وراه .. بجد
وعلى فكره بيطول اوى
هههههههه

--------------------

بارك الله فيك يانجم

النجم الازرق

ولا يهمك براحتك

********************

teef alnda

ربنا ييسر الأمور وتتعدل وتبقى عال ان شاء الله

معقووووووووووووووووووووووووووول منتدي مثل منتدانا يهجر

والله حرام
ابطال بتكتب وتخطط
كلام كبير

الف شكر يا سمسم ع البرنامج الذي ينم علي مبدع ومهموم ببلده
الف شكر للعبقري النجم علي روعة الرد وبساطة الاسلوب

عفوا سيادة الرئيس لست اسف عليك ولكن اسف على اجيال شربت
من فسادك

ماشاء الله

ربنا يبارك فيكم

الحمد لله اننا رتحنا من مبارك وحلم التوريث وكان كابوس

عليهم بعد ما صدعنا وطير النوم من عنينا

وان شاء الله مصر هترجع زي االاول واحسن

بس شوية صبر

يا جماعة اكثر من 30 سنة فساد وخراب مش معقول هيرجعوا ف ساعة

يارب احفظ مصر واحفظ شبابها اللي زي الورد
فاكر يا احمد

(كونوا انصار الله )

ربنا يوفقكم

كلام رائع يا نجم

ويا أسامة بصراحة يعنى السماعات الجديدة مضيعه الدنيا خالص

اى واحد ملهش شغلانة يفضل يلعب فبها

ويا شتيوى متزعلش نفسك

اللى عايز يسمع أحمد نجم السنه دى

ييجى البلد

وبجى الجامع الكبير

الساعة 8.30

بس كده

#############

على العموم

قريبا

سنرى مقطع للأحمد نجم

هو

بيتحمل دلوقتى

عشان اسامه يسمع السماعات الجديده

وشتيوى ميزعلش

[ندعوك للتسجيل في المنتدى أو التعريف بنفسك لمعاينة هذا الرابط]

الله يصلح حالك أستاذ ابراهيم ويخليك لينا يارب

عمرى ما أنسى كونوا انصار الله أبدا

فاكر لما كل واحد كان يقول حديث ع الأكل وواح حبيبنا قال لا تغضب

[ندعوك للتسجيل في المنتدى أو التعريف بنفسك لمعاينة هذه الصورة]

معلش فكرني مين اللي قال
اصل العملية خلاص العظمة كبرت

والذاكرة بطاريتها تعبانة

كل الشكر ليك اخي الغالي

أنت
***********
كنا كلنا ( أحمد )

واحنا خارجين قلت سلم على ماما يا احمد

كان قصدك شتيوى

ههههههههههههههههههه

انا بردوا باين العضمة كبرت والبطارية فضت
انا كمان مش فاكر
ابعت لى الموقف دا يانجم ع الخاص او ع الايميل

بس اكيد كنا 4 احمد دى اللى انا فاكرها و عارفها
ههههههه

المنتدى كله عظمه كبر

الله الله

ولسه

» أعضاء تحت الاضواء ( 4 )انا كنت مع الثورة من اول يوم
» أعضاء تحت الاضواء ( 1 ) كل سنة وانتو طيبين
» أعضاء تحت الاضواء ( 2 ) ذكرياتنا فى رمضان
» أعضاء تحت الاضواء ( 3 ) رمضان مبارك
» أعضاء تحت الاضواء ( 6 ) روح الثورة فى الجوابر

فعـاليات يوم الوفـــــاء بالجوابــــــر

أعضاء تحت الاضواء ( 7 ) على فين يا محروسة