ضيف الاسبوع الاول لكرسى الاعتراف "محمد رفعت" (مدير المنتدى)

كل سنه وانت طيب يا كبير
ان قولت افضل للاخر لو فى اسئله ناقصه ولا حاجه

س1 اكتر عيب يضايقك فى احد اصحابك ومن اللى فيه العيب ده ؟

س2 اذكر عيب وميزه فى كل من <الشيخه_ هلال_رضا نزيه_عرفات_نجم_شتيوى_سمسم+محمد يوسف_الاستاذ سيد رفعت_حسن احمد> اشخاص

الجوابر _ميت سلسيل _الدقهليه _بورسعيد _مصر _السعوديه > اماكن

س3 بتحب الجوابر اكتر ولا ميت سلسيل جاوب ببلد واحده

س4 ان شاء الله اول مولود ليك بنت او ولد هتسمى ايه

س5 اكتر شخص تاثرت به من الاسره والاصدقاء

س6 احسن مكان تحبه فى الجوابر غير حجرة حسن

أنا أشكرك يابو عائشة على تواجد بيننا فى المنتدى والذى دوما سيجعل كل أعضاء المنتدى فى ترابط
وتحقيق هدف من ضمن اهداف المنتدى الا وهى ( روح واحدة )

....

ماهو السؤال الذي كنت تنتظره ولم يسال بعد
كنت منتظر السؤال ده : أيهم تحب ميت سلسيل أم الجوابر بحكم أرتباطى بالبلدين ؟

نصيحة تنتظرها دائما
أحفط الله يحفظك

صفة في صديق مازلت تفتقدها
الإيثار
امنية كنت تحلم بتحقيقها ولم تتحقق بعد
كنت أحلم بأن اتزوج غير مصرية ولكن الحمد لله كانت فكرة خاطئة
كم اكبر مبلغ استلمته بيدك
بحكم طبيعة العمل والتعاملات اليومية كان 40 ألأف ريال
وكم هو المبلغ الذي تحلم بيه
مليون ريال
ما هي النصيحة التي نفسك تقولها لاخيك الكبير ولم تبلغه بها الي الان
ممكن ابلغه بها )
والله انا بقوله يحافظ على لم شمل العيلة لأن هو بيحل محل والدى وأنا عارف ان المسئولية هاتكون عليه كبيرة بس وهو قدها إن شاء الله
الله يخليك تبلغه بيها
ماتنساش

أشكر رضا نزيه على تواجده فى المنتدى وبجد منورنا
ومشكوووور على السؤال ده

...........
لخص كلا من
هلال_الشيخه_عرفات_سمسم_شتيوى_واللآمره_ونجم_وحجازى_وحسن احمد_ورضا نزيه
فى اربع كلمات؟

محمد هلال : رجل يتحمل أى مسئولية

أحمد الشيخه : رجل واثق من نفسه

أحمد عرفات : رجل يحب أى مغامرات

سمسم : صديق بمعنى كلمة صديق

شتيوى : رجولة ليس لها حدود

واللآمره : مش فاهمها ( وضح ...وضح كلامك ياأستاذ ليمبى)

أحمد نجم : مستقبل قراء ودعاة الجوابر

حجازى : طموحاته كتيرة بس صعبة

وحسن احمد : الصديق اللى تعتبره اخوك

رضا نزيه : ياريت ياخد حياته جد

ماشى ياعم أسامة ولا يهمك

*** احسن موقف طريف حصلك
بصراحة حصللى مواقف كتيرة :
بس أفتكر مرة وأنا فى الكلية كان عندنا إمتحان تشريح عملى وبعدين الدكتور بيطلب من كل طالب أنه يختار عظمة من عظام جسم الأنسان ويشرحها ( بتكون موجودة قدامنا على طرابيزة ) فالمهم الدكتور قاللى انت تشرح عظمة الفخذ والمشكلة أن أنا مكنتش بحضر السكاشن ، ولا سيكشن حضرته فى مادة التشريح لذلك ماكنتش عارف شكل العظام كنت مذاكر نظرى بس من الكتاب ، وبعدين روحت واخد عظمة على أساس أنها عظمة الفخذ وفضلت أقول له كلام وأشرح له نص ساعة وقلت له كل حاجة عن عظمة الفخذ فى الآخر راح قايللى " أول القصيدة .... " وراح سأل اللى جمبى قال له دى عظمة الفخذ قال لأ ( أنا قلت فى سرى أكيد مش هيا أومال بيسألك ليه ، دا أنت نبيه اوى ) دى عظمة إيه محدش رد عليه قاللى عارف دى عظمة إيه قلت له إيه ؟ قاللى دى عظمة العضد وأنا أقول فى بالى هو العضد طويل أوى للدرجة دى ياخبر أبيض وأبص لدراعى ...
وفضلت ادعى على زميلى اللى خد الفخذ وسابلى العضد وهو كمان كان واخده بالغلط بس هو خده قبلى
والحمد لله من ساعتها بقيت أعرف قيمة العضد بعد ماكنت مضيع قيمته صحيح القميص بنص كم ومش مخلينى واخد بالى منه أوى بس فى محاضرات كرة السلة عرفت قيمة العضد
والحمد لله نجحت فى المادة دى بعد ما أتسألت سؤال تانى

*** اكتر موقف محرج حصلك :
مرة كنت بتصل بواحد صاحبى بس ماكنتش كلمته من فترة ( لا داعى لذكر إسمه ) وفى نفس اللحظة اللى وصل له فيها خبر وفاة والدته كنت انا بتصل بيه وانا ماعرفش ان والدته اتوفت ، وبعدين انا دخلت في هزار جامد وأهرج واضحك معاه وهو مش بيرد عليا غير أنه يقول الحمد لله فأنا أستغربت ، قلت له مالك فى إيه
راح قابللى فى الآخر ان والدته اتوفت ، ساعتها كنت عاوز أكسر التليفون ٌلت لنفسى ياريتنى ما أتصلت ومن ساعتها وانا مكسوف من نفسى والله ومكسوف منه حتى مش عارف أكلمه من ساعتها والله
وياريت يقرأ الموضوع ده ويتقبل أسفى ويارب يجعلها آخر الآحزان ويتولى والدته برحمتها ويغفر لها ويجعل الحنة مستقرها ومسواها
اللهم آمين

*** اكتر موقف حسيت فيه بالظلم
لما بروح اى مؤسسة حكومية فى مصر
***
اكتر موقف حسيت فيه بالندم
لما فكرت أسافر عن طريق البر

*** ايه هى نقطة ضعفك
أصحابى

*** ما هو الشئ الذى لم تحققه حتى الان وتتمنى ان تحققه من فترة ولكن الظروف لم تسمح لك
كان نفسى أتزوج وأنا فى سن العشرين لكن الحمد لله
كل شئ مقدر ومكتوب

*** ايه هى البلد او المكان اللى تحب تعيش فيه فى مصر غير م سلسيل اوالجوابر
بورسعيد

*** ايه هو ناديك المفضل على الصعيد المحلى والعالمى
وليه بتشجع الناديين دول مع الشرح فيما لا يقل عن 3 اسطر

الأهلى لآنه هو نادى البطولات والمبادئ وأحسن نادى ادارى فى مصر وجماهيره أحسن جماهيربتشجع كورة فى مصر ممكن تسألأ أى مشجع أهلاوى دلوقتى يقوللك التشكيل قبل أى مباراة وكمان يقوللك على التغييرات وكمان فيه لاعيبة محترمة بجد واتحدى أى واحد يجيب لى لاعيبة محترمة فى الأندية التانية زى اللاعيبىة المحترمة اللى فى النادى الأهلى ( طبعاً مش كلهم بس الأغلبية العظمى )
ريال مدريد : نادى القرن الأوروبى ودائما ملئ بنجوم العالم

*** بتحب تشجع منتخب ايه غير منتخب مصر
الأرجنتين

*** مين اكتر لاعب انت بتشوف نفسك فيه على الصعيدين المحلى والعالمى او عالاقل معجب بيهم
محمد أبو تريكة والصاعد أحمد شكرى
وعالميا البرازيلى كاكا

*** شعورك ايه وانت قاعد عالكرسى وكل شوية واحد يسالك
والله أنا بجد سعيد جداً وأنا قاعد بين أخوانى داخل أسرة هذا المنتدى وكل واحد بيوجه لى سؤال وكل الكلام نابع من القلب للقلب
وبجد تجربة جميلة

بالنسبة للأسئلة الباقية ( الجزء التانى )

الاسئلة موجهة ليك بصفتك المدير العام للمنتدى

***ايه رايك بالمقوله التالية (المركبة ام رييسين تغرق ) ولو احنا طبقنا الكلمة دى على ادارة المنتدى ايه رايك

انا مش شايف ريسين خالص يعنى وبعدين الموضوع واضح المدير العام و نائب المدير العام يعنى تسلسل إدارى وبعدين أى قرار بناخده بيكون شورى بيننا ، العلاقة اللى بيننا أكبر من علاقة مدير عام ونائبه من قبل المنتدى ده
وأحب أوضح حاجة بس ان مفيش فرق بين مدير ونائب ومشرف وعضو المسميات دى ماهى ألا تكليف وليست تشريف فالمنتدى كله أسرة واحدة روحهم واحدة فكرهم واحد

*** مين العضو اللى تحب تقرا مواضيعه
[ندعوك للتسجيل في المنتدى أو التعريف بنفسك لمعاينة هذا الرابط] ، [ندعوك للتسجيل في المنتدى أو التعريف بنفسك لمعاينة هذا الرابط][ندعوك للتسجيل في المنتدى أو التعريف بنفسك لمعاينة هذا الرابط][ندعوك للتسجيل في المنتدى أو التعريف بنفسك لمعاينة هذا الرابط]
[ندعوك للتسجيل في المنتدى أو التعريف بنفسك لمعاينة هذا الرابط]

*** اكتر عضو اتخنقت منه
طبعا مفيش عضو خنقنى لسه ويارب ما يكون موجود فى منتدانا

*** ايه الحاجة اللى مش عجباك فى المنتدى
هو موضوع أختيار المواضيع البعض بيعتمد على النسخ واللصق والأطالة بلا فائدة - يجب أن نترك مساحة للإبداع بأقلامنا وبأفكارنا

*** 3 اعضاء فرحت لما سجلوا معانا
أبو زياد ، أبو سالم ، إبراهيم رفعت

*** 3 اعضاء مش موجودين معانا فى المنتدى وتتمنى انهم يسجلوا
حسن احمد ، مجدى عماد ، محمد فتوح
*** احسن 3 مواضيع عجبوك منذ نشأة المنتدى
وسقطت ورقة من شجرة العمر [ندعوك للتسجيل في المنتدى أو التعريف بنفسك لمعاينة هذا الرابط]
تخيل نفسك قلم رصاص albraa
أنت السبب فى تقدم المنتدى أو تراجعه شريف حسن مجاهد
*** نصيحة لكل عضو
المنتدى ده يعتبر بيتك التانى وكل الأعضاء هم أخوانك فيجب ان نتحلى بروح الحب والود التى تسود بين الأشقاء وكذلك حسن أختيار الكلمات والرد بإسلوب مهذب ولى رجاء ألا نتسرع فى ردودنا وأن نعطى كل مجتهد نصيبه من عبارات الشكر والتقدير ولا نكتفى بالرموز والصور الضاحكة فلك ان تعتبر الموضوع حوارا مطولا من خلال عرض الموضوع والردود التى تليه من الأعضاء وأيضا ردود صاحب الموضوع على ردود الأعضاء والله الموفق

*** شايف مين يصلح انه يكون مدير عام للمنتدى لو انت مش موجود مع شرط انى هفضل نائب مدير
والله المنتدى لسه فى بدايته وكل اللى فى المنتدى فى الفترة الحالية على درجة عالية من الكفاءة

*** هل انت شايف ان فيه اعداء نجاح للمنتدى
أى مشروع ناجح لابد وأن يكون له أعداء نجاح وهذا دليل على نجاح فكرة المنتدى والمنتدى ناجح بفضل الأعضاء الموجودين فيه وأفكارهم المختلفة وأحلامهم اللى أنشاء الله كلنا هانحققها من خلال المنتدى ده والمنتدى ليس حكررا على أعضاء معينه أو أشخاص بعينهم ولكن هو ملك للجميع ولهم أن يشاركون فيه كما يبدو لهم وكل شخص يرى فى نفسه أحداث تغيير فى المجتمع وتحقيق أهداف المنتدى فمرحبا به بيننا وأحب أقول أن أعداء اليوم سيكونون هم أصدقاء المستقبل وهذا كله يلقى بالمسئولية على كل عضو من أعضاء المنتدى لكى يظهر المنتدى بالمظهر اللائق من خلال كتاباتهم وردودهم وتناولهم القضايا بإسلوب عصرى
انا أرى أن المنتدى يتقدم بخُطى ثابته وفى تقدم بإذن الله بفضل جهود أعضائه

*** مين هما وايه مصلحتهم
والله هما مش معروفين لكن هما هايظهروا مع الأيام وبيشتغلوا فى الخفاء
والمصلحة من كده مش عارف والله
كل ده هانعرفه مع الأيام

*** هل ممكن يجى يوم وتتخلى عن المنتدى
لا طبعا أنا بعتبر المنتدى دا جزء من حياتى

*** ايه احلى نيك نيم عاجبك فى المنتدى
[ندعوك للتسجيل في المنتدى أو التعريف بنفسك لمعاينة هذا الرابط][/b]

أرحب بالأخ العزيز أحمد شتيوى للمرة الثانية
وأشكره على تواجده

لو مسكت رئيس جمهورية ايه اهم 5 حاجات تعملها فى مصر
1-تنفيذ فكرة الدكتور فاروق الباز بإنشاء وادى للنيل موازى للنيل الحالى بداية من البحر المتوسط وحتى أسوان
2- الأهتما م بقناة السويس ورفع رسومها مقارنة بسعر الدولارواليورو
3-أنشاء مشاريع جديدة فى الوادى الموازى للنيل وتوظيف شباب الخريجين
4-الأكتفاء بتوظيف الرجال فقط وانهاء كل وظائف السيدات ورفع رواتب الرجال حتى تسد حاجات أسرهم وعلى المراةأن تلتزم بتربية أولادها لتكوين جيل صالح
5-ان تكون فترة الرئاسة 4 سنوات فقط غير قابلة للتجديد

-- لو مسكت مدير الشغل بتاعك تعمل ايه ؟؟
هاطبق الثواب والعقاب لآن دا لو أتطبق اى منظومة هيكون الشغل تمام وبعيد عن الظلم
-- لو مسكت عمدة الجوابر ايه اول حاجات نعملها ؟؟
أولا العمده حاليا ليس لديه سلطة مثلما كانت فى سابق العهود ولكن دعنى أعتبر وكأننى مسئول كبير فى البلد هاعمل نظام دوريات فى البلد من بعد الساعة 12 ليلاً للحفاظ على أمن وأستقرار القرية

-- لو مسكت رئيس مركز شباب الجوابر ايه اول 5 حاجات تعملها ؟؟؟
1-العمل على أنشاء ملعب قانونى تبعا للميزانية المقررة من وزارة الشباب والرياضة
2-أنشاء صالة حفلات
3- الاهتمام بالطلائع
4- عقد الندوات والدورات التثقيفية والتوعوية للشباب وتفعيل دور مراكز الشباب
5-تهيز صالة ألعاب رياضية متوفر بها أحدث الأجهزة

--
لما ان شاء الله نطلع رحلة فى الصيف تطلب ايه من المجموعة اللى معاك وايه
المكان اللى نفسك تروحة مع المجموعة دى وعايز مين يكون ضيف الرحلة السنة
دى ؟؟
طبعا المجموعة اللى بنطلع معاهم كل سنة والى أغلبهم موجودين فى المنتدى واللى ماكانش ليا نصيب وأكون معاهم الصيف اللى فات لكن ان شاء الله فى المستقبل القريب بإذن الله ويكون معانا نسبة كبيرة من أعضاء المنتدى طبعا بقيادة الأستاذ أحمد سالم

س1_ لو وقعت فى محنة لا قدر الله ازاى تخرج منها وياريت فى نقاط؟
والله أنا دايما لما اكون فى محنة أدعى بهذا الدعاء " لا إله إلا أنت سبحانك إنى كنت من الظالمين"
وربنا بيسهلها وييسرها

س2_اختصر ايام عين شمس فى عشر كلمات؟
دى كانت أحلى تجربة أستفدت منها كتير جدا فى حياتى

س3_شخصيات تدين لها بالفضل بعد الله؟
والدى رحمه الله - وأخى إبراهيم - وأخى السيد -وأساتذتى فى جميع مراحل التعليم المختلفة

س4_انت اخترت 6_9_2009 تاريخ كويس بالنسبة لك ممكن اعرف ليه؟
دا كان يوم خطوبتى
عقبالك ياعم أحمد

س5_ايه حكاية ( وقفوهم انهم مسئولون )؟
كان فى شريط قرآن للشيخ على بن عبد الرحمن الحذيفى ( سورة يس والصافات فكان الوجه الأول بينتهى عند الآية " وقفوهم إنهم مسئولون" فكنت أقلب الشريط وأسألأ أحمد نجم سؤال عادى هو مش بيكون مركز معايا من ألأول وأسأله الآية اللى بعد وقفوهم إنهم مسئولون إيه .. وخلال رده عليا يكون الشيخ الحذيفى بدأ " مالكم لا تناصرون"
وكل مرة أكررها معاه على كده ألى أن صارت ذكرى جميلة بيننا نحلق بها فى آفاق الماضى

س6_صحابى عجبتك شخصيته ؟
سيدنا أبو بكر
س7_صحابى تتمنى لو كان موجود فى زمانا ؟ ليه ؟
سيدنا عمر بن الخطاب

عاوز اعرف اخر كلمة تقولها قبل ما تقوم من على الكرسى ؟

أتمنى لى وجميع أعضاء المنتدى تحقيق كل الأمانى والأحلام والله الموفق

كنت مرتاح ع الكرسى ؟
الحمد لله كنت مرتاح بس حسيت وكأننى فى أمتحان الثانوية العامة

س1 اكتر عيب يضايقك فى احد اصحابك ومن اللى فيه العيب ده ؟
هو عيب عدم الجدية ودا موجود فى كل أصحابى

س2 اذكر عيب وميزه فى كل من
<الشيخه
مميزاته : الأحترام
عيوبه : الخجل ولما يخرج عن شعوره احيانا
_ هلال
مميزاته : رجولته
عيوبه : خلط الجد بالهزل

_رضا نزيه : جواه هدف عاوز يحققه
عيوبه : اصدقاء معينة لو بعد عنها هايحقق كل |أهدافه

_عرفات
مميزاته : مغامر
عيوبه : أحياناُ مغامراته بتكون مش تحت سيطرته
_نجم
مميزاته : خلوق وودود
عيوبه : لما ييخرج عن شعوره
_شتيوى
مميزاته :رجولة بمعنى الكلمة
عيوبه : لما بينفذ اللى فى دماعه
_سمسم
مميزاته : اخلاقة العالية وذكائه
عيوبه : لما يخرج عن شعوره أحيانا

محمد يوسف
مميزاته : محب للغير
عيوبه : الإنفعال احيانا
_الاستاذ سيد رفعت
مميزاته : طيبته وذكائه وشخصيته
عيوبه : العصبية أحيانا
_حسن احمد
مميزاته طيبته
عيوبه : طيبته أيضا

اماكن

الجوابر
مميزات :كل اهلها يعرفون بعضهم البعض
عيوبها : أنتشار الشائعات والنميمة وبعض الناس الذين يسعون على إلحاق الضرر بغيرهم
_ميت سلسيل :
مميزات :بلد تسعى للتطور يوما بعد يوم بواسطة القيادات لموجودة بها
عيوب : كثرة أعداء النجاح بها
:
_الدقهليه : مميزاتها : محافظة جميلة
عيوبها : عدم الأهتمام بالمراكز والقرى النائية

_بورسعيد : مميزات : مدينة جميلة تتمتع بميزانية محافظة
عيوب : شعبها
_مصر مميزاتها : مصر أم الدنيا
عيوبها : اولادها لا يعتبرونها أمهم
_السعوديه
مميزات : دولة محترمة وبها أختلاف كبير بينها وبين بلدى مصر
عيوبها : نظام الكفالة وبعد الأنظمة الآخرى
>

س3 بتحب الجوابر اكتر ولا ميت سلسيل جاوب ببلد واحده
لا الاجابة صعبة تكون ببلد واحدة لآن انا عشت هنا وهنا وأدين للبلدين بالفضل العظيم ولكن فى ميت سلسيل مميزات مش موجوده فى الجوابر وفى الجوابر مميزات مش موجوده فى ميت سلسيل

س4 ان شاء الله اول مولود ليك بنت او ولد هتسمى ايه
إن شاء الله لو ولد مهاب او يزن
ولو بنت دى على أمها بقى هيا اللى تسميها

س5 اكتر شخص تاثرت به من الاسره والاصدقاء
من الأسرة :والدى
ومن الأصدقاء أسامة

س6 احسن مكان تحبه فى الجوابر غير حجرة حسن

الطريق اللى بعد كوبرى الجمعية

انا بحييك على ردودك الا حسينا فيها كلنا بالصدق ويارب كل الا هايقعد على الكرسى يجاوب بالصدق ده
لان انت بصراحه انسان فى قمة الادب والاخلاق وياريت كتير مننا يتعلم ده
انا واحد من الناس لم اتقرب اليك الا من فتره قريبه
وانت فعلا انسان على خلق ونعم الصديق المخلص الذى يعتمد عليه فى اى شئ
ومش ها كتر عليك فى الاسئله لان انا عارف انت اتهريت اساله
ومحدش رحمك من الاسئله
1-لو انت بتملك امكا نيات كبيره ممكن تعمل ايه للجوابر
2-لو بقى عندك 60سنه بعد عمرين طوال يعنى تفكر فى ايه تعمله
3-لو نفسك تشيل فتره من حياتك ممكن تشيل الفتره نهى
4-كلمة لوم تقولها لحسناحمد
5عايز اول حاجه تعملها اما ترجع من السفر هى ايه

بصراحة يااستاذ محمد اناسعيد بكلماتك الجميلة اللتى ان دلت على شىء فانما تدل على انك شخصية مميزة قيادى واثق من ادواتة
على درجة كبيرة من الثقافة والعلم والادب اللذى اتمنى ان ارى الشباب يسيرو على نفس الطريق وانا اتشرف ان اكون تحت قيادتكم
واكن لكم الحب والامتنان والشكر على ماقدمتة وماستقدمة لخيرالدين والدنيا
اخوك
ابو ذياد [ندعوك للتسجيل في المنتدى أو التعريف بنفسك لمعاينة هذه الصورة]

1-لو انت بتملك امكانيات كبيره ممكن تعمل ايه للجوابر
والله أحاول مساعدة المحتاجين واعمل جاهدا على تطوير البلد
2-لو بقى عندك 60سنه بعد عمرين طوال يعنى تفكر فى ايه تعمله
طبعا هاتفرغ للعبادة فقط وأحاول أقابل كل أصدقائى الى قابلتهم طوال حياتى
3-لو نفسك تشيل فتره من حياتك ممكن تشيل الفتره نهى
فترة المرحلة الإعدادية
4-كلمة لوم تقولها لحسن احمد
أنا مش بلومه لا أنا هاعاتبه بس على حاجات قلتها له من زمان ومش بيعمل بيها وإتفقنا عليها
وإن شاء لله أتمنى له التوفيق والنجاح فى جميع مراحل الحياة
5عايز اول حاجه تعملها اما ترجع من السفر هى ايه
طبعا أقّبل إيد أمى وراسها ورجليها كمان وادعو الله أن يبارك بنا فيها ويبارك لنا فى عمرها

جزاك الله خيرا على كلماتك الجميلة والتى أعتبرها وسام على صدرى
وشهادة أعتز بها طوال مسيرة حياتى
ونحن سعداء بأن نكون بصحبتكم داخل منتدى يجمع صفوة وخيرة شخصيات البلد

كل الشكر والتقدير يا أبو زياد
[ندعوك للتسجيل في المنتدى أو التعريف بنفسك لمعاينة هذه الصورة]

انا بشكر كل الأعضاء اللى شرفونى فى موضوع كرسى الأعتراف
وبصراحة كنت سعيد جداً طوال هذا الإسبوع وجمال الحوار الأخوى بينى وبين زملائى الأعضاء

كما أشكر الأعضاء الذين لم يحالفهم الحظ للتواجد فى هذا الحوار لظروف ما أو لإنشغالهم

وأشكر أيضا كل من مر وقرأ سطرا فى هذا الموضوع الذى أعتبره بمثابة جزء من تحقيق شعار المنتدى وهو الروح الواحدة

وأتمنى ان تستمر وتستمر هذه الروح الواحدة

و اتمنى للجميع العلا والرقى ولمنتدانا التقدم والأزدهار

ونسعد بصحبتكم
مع ضيف جديد فى كرسى الأعتراف

أخوكم
محمد رفعت

[ندعوك للتسجيل في المنتدى أو التعريف بنفسك لمعاينة هذه الصورة]

» ضيف الاسبوع الثالث لكرسى الاعتراف . الاستاذ احمد عرفات
» ضيف الاسبوع الرابع لكرسى الاعتراف المهندس / شريف حسن مجاهد
» ضيف الاسبوع العاشر لكرسي الاعتراف(المهندس السيد رفعت)
» ضيف الاسبوع الثامن لكرسي الاعتراف أ(محمد يوسف علوان)
» قصيده لرجوع الاستاذ محمد رفعت( مدير المنتدي)

فعـاليات يوم الوفـــــاء بالجوابــــــر

ضيف الاسبوع الاول لكرسى الاعتراف "محمد رفعت" (مدير المنتدى)