ضيف الاسبوع الثالث لكرسى الاعتراف . الاستاذ احمد عرفات

مش محتاج توصيه على ايه من غير متقول عملت الا ربنا يقدرنى عليه
واما نتقابل لنا بقيه
--عرفات -- خمس شخصيات مفتقدهم ونفسك تشوفهم ؟؟؟
رضا عرفات-اسلام كامل-حماده رفعت-(احمد سعد-احمد نصر)اصحاب الجامعه
--ايام الجامعة احلى خروجة كنت تخرجها كانت فين ؟؟
كنت بحب اخرج من بعد العصر فى مصر فى وسط البلد بس كنت بالاخص على الكورنيش فى التحرير
--ايه رايك وبكل صراحة فى
- الاستاذ محمد فتوح
من الشخصيات الا انا بحبها جدا والله وعرقته عن قرب اكتر ايام الجامعه وكنت بروح ازوره ديما فى المدينه
وهو كريم جدا على فكره والله ومحترم جدا جدا وذو اخلاق عاليه
وفيه ميزه انا شخصيا بعتبرها قلما ان تجدها وهى الضميرومخلص جدا فى شغله وانا بحبه قوى والله
ربنا يبارك فيه ويذيده انشاء الله
-محمد حامد قاسم
زميلى وصديقى وحبيبى كلنا نعرف شخصيته لانه مثال يحتذى به
فى كل شئ من يعرفه يحبه
-وليد محمد فرح
شخصيه محترمه جدا ولكن ينقصه بعض الاشياء ويبقى شخصيه مثاليه جدا
وانا على المستوى الشخصى بعزه جدا
-احمد عرفات
اتركه لكم
-اسلام كامل
طيب جدا وسايب حياته ماشيه على بركة الله
-احمد شتيوى
طيب جدا خجول جدا يتقى الله فى كل شئ بيعمله بيحب اصحابه قوىومخلص ليهم جدا
وبحبه جدا على المستوى الشخصى وبحب اشوفه دايما والله
وطبعا عارفين عنه انه جدع
ربنا يبارك فيه ويعطيه على قد نيته
-احمد نجم
طيب جدا بيحب الناس كلها مابيشلش من حد حاجه فى قلبه خالص علشان كدا الناس بتحبو كلها
مبتسم-فيه مميزات كتيره مش هاقدر احصيها
بس كل الا ممكن اقوله ان انا بحبه جدا على المستوى الشخصى
وبكن له كل الاحترام والتقدير لما وصل له
وربنا يزيده كمان وكمان
- افراد فى قريتنا تراها يستريح قلبك وتحب ان تجلس معها وتناقشها
ياريت تراعى الترتيب ويكفى 5 افراد فقط
لى عوده للرد عليه
------------------

انا فى انتظارك

متشكر جدا ياوليد على الكلام ده
وربنا يعلم معزتك عندى قد ايه
وربنا يرجعك كدا بالسلامه ونفرح فيك
وانت قاعد فى الكوشه
وفقك الله

ازيك ياعم احمد اخبارك ايه دلوقتي واخبار الكرسي ايه
وبعدين عندك حق تتمشي ع الكورنيش اللي في التحرير انا كنت هناك امبارح جااااااااااااااااااااااااااااااااااااااامد
انا هكمل اسئلتي ويارب مااكون تقلت عليك

مــــن انـــــــت ؟
ماهو هدفك ؟
ماهي أمنيتك ؟
ماهي رؤيتك للحياة ؟
ماهي رسالتك في هذه الحياة ولمن توجهها ؟
ماهو أفضل مكان تتردد إليه ؟
مـــــن يطـــــربك ؟
من هو توأم روحك ؟اذكر اسمه؟
مالذي يشعرك بأكثر قدر من الحرج ؟
شخص تحتاج لقربه الآن منك ؟؟اذكر اسمه؟
متى تغضب ؟
شخص لاترفض له طلبا ؟اذكر اسمه؟
أعظم شيء فقدته ؟
وأعظم جرح دفنته ؟
ماذا يمثل لك الموت ؟
دعوه صادقه من اعماق قلبك لمن تهديها ؟
رايك في شريف؟بكل صدق

واخيرا لك مني كل الحب والاحترام
واتمني لك التوفيق في حياتك وان يرزقك الله الزوجه الصالحه
اخوك / شريف حسن

بس ايه رايك فى الكورنيش عندى حق مش كدا
ماشى ياشريف باشا

مــــن انـــــــت ؟
الحمد لله بحب الناس وبحترمهم كلهم لما بزعل من حد بقوله علشان ماشلش من حد
بحب اصحابى قوى قوى
والباقى الناس الا تقوله مش انا

ماهو هدفك ؟
انى اقدر اعمل حاجه دلوقتى فى مركز الشباب تفيد البلد
والناس تفهم ان الوضع اتغير غير الا قبل كد وده هايجى بمساعدة الناس
والله دى من ضمن اهدافى دلوقتى وربنا يعنى

ماهي أمنيتك ؟
قد سبق الرد

ماهي رؤيتك للحياة ؟
الحياه دلوقتى صعبه جدا وربنا يعنا كلنا عليها
قال الرسول صلى الله عليه وسلم " سوف ياتي زمن علي أمتي الماسك علي دينه كماسك علي
حجر من جمر
ده اكثر دليل عن زماننا هذا
ماهي رسالتك في هذه الحياة ولمن توجهها؟
ياريت توضح اكثر

ماهو أفضل مكان تتردد إليه ؟
مكان تواجد اصدقائى

مـــــن يطـــــربك ؟
عمرو دياب بس دلوقتى مش بسمع اغانى

من هو توأم روحك ؟اذكر اسمه؟
كل من قرب الى قلبى

مالذي يشعرك بأكثر قدر من الحرج ؟
عندما اوعد شخص واخلف ميعاده

شخص تحتاج لقربه الآن منك ؟؟اذكر اسمه؟
والدى

متى تغضب ؟
عند حدوث اخطاء فى حقى او يحدث شئ غلط امامى

شخص لاترفض له طلبا ؟اذكر اسمه؟
الاستاذ صلاح سلامه

أعظم شيء فقدته ؟
والدى

وأعظم جرح دفنته ؟
الحمد لله لم اجرح حتى الان

ماذا يمثل لك الموت ؟
اوامن به وبحس ديما ان هو قريب منى

دعوه صادقه من اعماق قلبك لمن تهديها ؟
الى حال الامه

رايك في شريف؟بكل صدق
والله انا معرفتى بيه ليست بصداقه شديده ولكنه شاب مجتهد لمست فيه انه يحاسب نفسه
من الشخصيات الا ليها هدف فى حياتها
لم يؤذى احد لم اشهد عليه انه اخطأ فى حق احد
وربنا يزيده يارب ويوفقه

شكرا ياعم شريف على اسئلتك دى
ويارب اكون وفقت فى الرد عليك
واشكرك على الدعوه الجميله دى

معلهش ياعم احمد

سؤال بسيط جدا

ما رايك فى الشخصيات الاتية ؟ على هيئة ايجابيات وسلبيات

وراعى ضميرك فى الاجابة ولا تخجل من احد

احمد عرفات

حسن احمد محمود

اسامة

محمد هلال

احمد على

شتيوى

رضا نزيه

الشيخة

احمد نجم

محمد رفعت

واخيرا .... ايه رايك فى كرسى الاعتراف؟

قشط ياعرفات ياابو قلب كبير

اي اخبار الكرسى

دا اخر يوم ليك ولا ايه النظام؟؟

انت عايز سفن اب

[ندعوك للتسجيل في المنتدى أو التعريف بنفسك لمعاينة هذه الصورة]

يالذيذ يارايق

دا بقى احمد عرفات وهوا قاعد على كرسى المحل وبيشرب 7 اب

اكيد السفن دا بعد اكلة كوارع انا على الدردشة [ندعوك للتسجيل في المنتدى أو التعريف بنفسك لمعاينة هذه الصورة]

احمد عرفات
اتركه لكم

حسن احمد محمود
هو انسان كويس وقلبه طيب ومحبوب من الناس كلها ومابيزعلش من حد وبيسامح بسرعه
اى حد غلط فيه ولكن ينقصه التقرب الى الله اكثر مما هو فيه
واعتقد ان حسن مش بيتعلم من الاحداث الا حصلت حوله
وربنا يوفقه ويجعله قريبا اليه

اسامة
شخصيه مجتهده له مبادئ واهداف فى حياته عايز يحققها
ويوصلها انسان ايجابى فى حياته بس دماغه نشفه شويه بس مش فى كل الاحيان

محمد هلال
زميلى وصديقى وحبيبى
طيب جدا وحساس جدا بيحب اصحابه قوى ومخلص جدا ليهم وكريم جدا جدا
مابيزعلش حد ولا بيحب حد يزعل منه ملتزم دينيا
وفيه افكار فى دماغه انا مش قادر افهمها بس انشاء الله ربنا يعنى وقدر افهمها
ويارب يوفقه فى حياته ويعمل كل الا يتمناه

واحب اقوله ان انا بحبه جدا والله وكنت منتظر اسالته

احمد على
شخصيه كويسه ومحبوب من كل الناس مابيزعلش حد خالص
ومجتهد جدا فى حياته بدليل انه اول واحد اتجوز فينا ربنا يسعده
ويوفقه فى حياته

شتيوى
طيب جدا خجول جدا يتقى الله فى كل شئ بيعمله بيحب اصحابه قوىومخلص ليهم جدا
وبحبه جدا على المستوى الشخصى وبحب اشوفه دايما والله
وطبعا عارفين عنه انه جدع
بس اما بيغضب اجارك الله

ربنا يبارك فيه ويعطيه على قد نيته
رضا نزيه
بيحب الضحك ديما حتى وهوا زعلان ومهموم
جدع جدا يعتمد عليه فى امور كتير قوى
اكتر واحد بيستحملنى ومابيزعلش منىوهو من الشخصيات المقربين الى قلبى جدا
بس هو محتاج يفكر فى نفسه شويه ومستقبله ويجازف ويعتمد على ربنا فى حياته

ربنا يوفقه فى حياته

الشيخة
من الشخصيات الا بتراعى ربنا فى الصغيره قبل الكبيره وانا لمست ده عن قرب
جدع مع اصحابه وبيحبهم ما بيحبش يزعل حد منه ولو غلط فى حد بيعتزرله
خجول جدا بس المشكله ان زعله وحش شويه بس بيسامح بسرعه لان قلبه طيب
وربنا يوفقه ويلاقى بنت الحلال الا يتمناها

احمد نجم
طيب جدا بيحب الناس كلها مابيشلش من حد حاجه فى قلبه خالص علشان كدا الناس بتحبو كلها
مبتسم-فيه مميزات كتيره مش هاقدر احصيها
بس كل الا ممكن اقوله ان انا بحبه جدا على المستوى الشخصى
وبكن له كل الاحترام والتقدير لما وصل له
وربنا يزيده كمان وكمان

بس اتمنى ان شخصيته تكون اقوى من كدا شويه
وربنا يسعده

محمد رفعت
شخصيه محبوبه بيحب الخير لاصحابه يعتمد عليه فى امور كثيره
متقرب الى ربنا وملتزم بيسعى الى تحقيق امانيه
عايز يتجوز ويدخل دنيا ربنا يحقق ليه الامنيه دى
فى شخصيته بعض الغموض مش اى شخص يعرف يحدد ها
ويارب نشوفه كدا قاعد فى الكوشه عن قريب انشاء الله

واخيرا .... ايه رايك فى كرسى الاعتراف؟
تجربه جميله جدا جدا واحساس جميل وانت بتجاوب بكل صدق لان انا والله بجاوب بكل صدق
لازم الشخص يجاوب بصراحه على الاسئله لان ده بيوصل للناس
اذا كان صادق ام لا
ويارب الناس تلمس مدى الصدق الا قى كلامى لان انا ماقولتش الا الصدق
وانا على المستوى الشخصى سعيد بالتجربه دى
بس كنت احب ان الناس كلها تسالنى اذا كانو مشتركين فى الكرسى ام لا

وشكرا يا احمد على الاسئله دى
وانا والله جوبت عليك بكل صراحه
ربنا يوفقك

شكرا ياباشا على الكرسى ده

اهو ده المزاج ولا بلاش

عقبال ما نعملك كرسى ذى ده

حبيبي الغالي
ابو عرفات
ممكن اسئلة ولا خلاص

ماهي الصفة التي ما زلت تبحث عنها في
نفسك
صديقك
جارك
استاذك
مديرك
اخوك
بنت الحلال
حماك
حماتك
[ندعوك للتسجيل في المنتدى أو التعريف بنفسك لمعاينة هذه الصورة]

حبيبى عرفات
شو اخبارك
والله واحشنى اكتير ..اكتير
ممكن اسئل ولا ..؟؟

بص كدا كدا انا هاسئل حتى لو انت قلت لا .....؟ واحسبها زى ماتحسبها ؟؟

-- انا سامع ان النادى فيه بعض التجديدات....... ممكن اعرف اى هيا الخطة اللى نازلة فى تجديد مبنى مركز الشباب ؟؟ ومتى ستقام هذه التجديدات ؟؟

-- هل ادارة النادى لها علاقة بقيام المعسكرات ؟؟ مافيش معسكر حلو كدا على ايدك يامعلم ... زى بتاع ابو قير

--كنا بنقترح عليكووا بعمل قاعة افراح ... انت ايه رايك بصفتك انك عضو تحت السن ...وايه راى باقى الاعضاء
....ولو ناويين تعملوها هاتتعمل امتى ....؟؟

--رسالة بتوجهها لزمايلك اعضاء النادى ....

ارحب بالاستاذ احمد عرفات فانى أحبه فى الله
وهو السبب فى اشتراكى بكرسى الاعتراف الذى يعتبر من اهم وانجح مواضيع المنتدى
ويارب تكون ناجح فى حياتك ويحبب الناس فيك
فانت من اعز شباب الجوابر الذين احب ان اتعلم منهم واجلس معهم

واريد ان اسئلك بعض الاسئلة

احلى سنه قضيتها فى حياتك وتتمنى انها ترجع ؟؟
رد فعلك ايه لما علمت بوفاة والدك؟
هل لوفاة والدك تاثير فى حياتك العمليه؟
ما الوظيفة التى كنت تتمناها؟
معروف ان صوتك بيكون عالى وخلقك بيكون ضيق فى الملعب ممكن نعرف ايه السبب ؟
ما رايك فيا ؟ بس بجد
ويارب لو انت زعلان من رامبو فى اى حاجة ياريت تعرفوا ولو حتى يكون بينى وبينك
تنصحنى بايه ؟ لانى باعتبرك اخ كبير

يلا بقى كفاية كدا
واكيد لى عودة
اخوك رامبو

يا باشا انت تسال فى اى وقت
واى اساله انت تحب تسالها
والله انت من الناس الا بفرح لما اجد انه سالنى على كرسى الاعتراف

ماهي الصفة التي ما زلت تبحث عنها في
نفسك

عدم العصبيه والهدؤ

صديقك
يعرف قد ايه انا بحبه
ويستحملنى
لان انا والله بحب اصدقائى جدا جدا

جارك
الحفاظ على حقوق الجار

استاذك
الضمير

مديرك
المساواه

اخوك
تحمل المسؤليه

بنت الحلال
تستحملنى

حماك
هو لسه طبعا فى علم الغيب بس حاجه واحد احب انه يعرفها
يفهمنى

حماتك
تحبنى

هانتظر منك المزيد

اهلا شتيوى
انت الا حبيبى والله
اسال ياعم ذى ماتحب

-- انا سامع ان النادى فيه بعض
التجديدات....... ممكن اعرف اى هيا الخطة اللى نازلة فى تجديد مبنى مركز
الشباب ؟؟ ومتى ستقام هذه التجديدات ؟؟
هوا فعلا ده صحيح وانشاء الله يعتبر بدانا فى الخطوات التنفذيه كان فيه اجتماع قبل امس واتفقنا على البدائيات وانشاء الله
هانبدا فى التنفيذ خلال الايام القليله القادمه وربنا يعنا ونقدم حاجه كويسه للبلد

انشاء الله الخطه هى عمل غرفة للحديد وعمل سيراميك للنادى
وتشطيب الدور العلوى كهرباء وكل مايلذم وتجديد دورة المياه كامله وعمل دورة مياه فى الطابق العلوى
وانشاء الله اى شئ هايحتاجه النادى او الملعب هايتعمل باذن الله
دعوتكم معانا ان مايحصلش عواقب لان احنا تعنبنا كتير وعايزين ننفذ بقى

-- هل ادارة النادى لها علاقة بقيام المعسكرات ؟؟مافيش معسكر حلو كدا على ايدك يامعلم ... زى بتاع ابو قير
لاطبعا لانها بتيجى من المدريه على ادارة ميت سلسيل وبعدين تبعتلنا جواب لو فيه معسكرات
بس لابد من المتابعه من مركز الشباب
وانا كنت فى ادارة ميت سلسيل قريبا وسالت على معسكرات بس مافيش حاليا واكدت على الاداره لو فيه اى حاجه تبلغنا بيها وربنا يقدم مافيه الخير

وياريت فيه معسكر ذى ابو قير ده يا احمد والله بس انشاء الله لو فيه اى حاجه هانعلن عنها

--كنا بنقترح عليكووا بعمل قاعة افراح ... انت ايه رايك بصفتك انك عضو تحت السن ...وايه راى باقى الاعضاء
....ولو ناويين تعملوها هاتتعمل امتى ....؟؟

بالنسبه لقاعة الافراح كل الاعضاء موافقين على انشائها
وانشاء الله بعد تشطيب النادى لو الميزانيه سمحت هانفذها على طول بدون تردد
وانشاء الله احتمال كبير تتعمل مع شغل النادى

--رسالة بتوجهها لزمايلك اعضاء النادى ...

هو فى خلاف بينا فى وجهات النظر بس ياريت مايستمرش
بس احب اقول لاى زميل ان النادى ده ملك البلد كلها واحنا فى عمل تطوعى
ياريت نتواجد باستمرار ويكون راينا فى مصلحة البلد وخدمتها
ونعين بعض للنهوض بالنادى الى اعلى المستويات
وده هايجى بالاتفاق فى الراى وهو خدمة البلد( فقط)

واحب اضيف كلمه للشباب

احنا من غير مساعدتكم مش هانقدم حاجه لازم مساعدتكم وثقتكم فينا على شان نقدر نقدم كل مايلزم للشباب وللبلد
وربنا يعنا كلنا على فعل الخير

انا سعيد باسالتك دى يا أحمد جدا
لان انت اول واحد سالنى على مركز الشباب
لان انا عايز اوضح اشياء اكتر من دى للناس كلها

احبك الذى احببتنى فيه
اهلا بيك يارمبو الجوابر
انا سعيد بمشركتك دى وسعيد بيك
وربنا يعلم انا بعزك قد ايه والله
لان انا فعلا بحبك وبحترمك والله

حلى سنه قضيتها فى حياتك وتتمنى انها ترجع ؟؟
سنة تانيه كليه واحب ارجع ليها تانى
لان انا كنت مع صحبه كويسه قوى
وما كنتش شايل هم حاجه
بروح الجامعه وبشوف اصحابى ومرتاح نفسيا وما فيش اى حاجه بفكر فيها

رد فعلك ايه لما علمت بوفاة والدك؟
اولا انا عرفت بوفاة والدى تانى يوم بعد العصر مش فى اليوم الا الدفن فيه
حتى ثالث يوم مش التانى لان هو اتوفى4-1-2005
والدفن الظهر5-1-2005
وكان فى اليوم ده انا عندى امتحان كان الظهر باردو علشان كدا ما حدش قالى على الخبر
فرجعت تانى يوم وحسيت من الناس الا حوليا مافيش حد قالى انه مات
وما كنتش مصدق طبعا انه توفى كنت بدعى فى الاول انه يكون فى المستشفى وميكونش اتوفى
بس ده حكمت ربنا والحمد لله
حسيت وقتها ان مش هاعرف اعيش تانى من غيره لان هو كان كل حاجه فى حياتى
وطبعا كان شايل عنى كتيييييير قوى الله يرحمه
والحمد لله على كل شئ اهو انا عايش والحمد لله بكمل رسالته وربنا يقدرنى عليها
ربنا يرحمه ويدخله الجنة برحمته امين امين

هل لوفاة والدك تاثير فى حياتك العمليه؟
اكيد طبعا ليه تاثير كبير وجوده طبعا كان يفرق كتير معايا وفى حياتى كمان

ما الوظيفة التى كنت تتمناها؟
انى اشتغل فى مجالى مهندس زراعى

معروف ان صوتك بيكون عالى وخلقك بيكون ضيق فى الملعب ممكن نعرف ايه السبب ؟
انا من النوع الا مابيعرفش يسكت على اى شئ غلط او اى حاجه ممكن تعصبنى
فبنفعل بسرعه لان انا عصبى جدا فا بالتالى صوتى بيعلى
وحا ولت كتير انى اتغير بس مش عارف
بس ربنا يعنى واتغير

ما رايك فيا ؟ بس بجد
انت انسان بتحترم الكبير وبالاخص اما بتحب حد بتحترمه جدا
وجدع جدا وقلبك مافهوش خبس قلبك طيب جدا وبتحب الخير للناس
وملتزم بس مش كليا لسه فيه شوية حاجات عايزه تظبط
وانا من الناس الا بعزك والله وربنا يكرمك فى حياتك ويوفقك

ويارب لو انت زعلان من رامبو فى اى حاجة ياريت تعرفوا ولو حتى يكون بينى وبينك
انا والله مش زعلان منك فى حاجه ولو زعلان هاقولك والله على طول

تنصحنى بايه ؟ لانى باعتبرك اخ كبير
تلتزم اكثر من كدا شويه واما اقبلك هاقولك بس انا عارف انت عرفت قصدى ايه

مستنيك يارمبو

السلام عليكم ورحمة الله وبركاته

أهلا ومرحبا بك للإسبوع التالى لك فى كرسى الأعتراف

واتمنى أن تستفيد ويستفيد نحن وباقى الأعضاء من هذه الردود والأسئلة

وإليك بعض الأسئلة

* انا أعلم ان على كاهلك مسئولية كبيرة فى مركز الشباب وتحمل أيضا نبض ومطالب الشباب وإن شاء الله ربنا يوفقك فى تحقيقها
من وجهة نظرك ما الذى يحتاجه مركز الشباب من جميع النواحى؟

* لو كنت مديرا للمنتدى من تختار ليكون نائبك ؟ومن تختار ليكونوا مشرفون للأقسام؟

* أريد تقييم للمنتدى من ناحية الأعضاء والموضوعات والردود؟

اهلا بيك كابتن حماده
وشرفتنى فى كرسى الاعتراف

* انا أعلم ان على كاهلك مسئولية كبيرة فى مركز الشباب وتحمل أيضا نبض ومطالب الشباب وإن شاء الله ربنا يوفقك فى تحقيقها
من وجهة نظرك ما الذى يحتاجه مركز الشباب من جميع النواحى؟

مركز الشباب فى الفتره دى بيعدى عليه ايام صعبه جدا
وربنا يعيننا ونعديها باذن الله
اول حاجه طبعا محتاجين ثقة كل فرد من اهالى قريتنا للاداره الجديده ويكونو واثقين تماما ان اى شئ هايطلبوه مننا انشاء الله نعمله فى قدر المستطاع
فيه دلوقتى فكر جديد و نشاط جديد فيه كمان تجديد دم فى الاداره
فكل ده بيساعد على تلبية طلبات كل اهالى البلد وخاصة الشباب

وياريت من خلال السؤال اللى انت سالته ده
بقول اللى عنده اى فكره جديده ممكن يقول لنا عليها وان شاء الله ننفذها

يحتاج(صاله لكمال الاجسام-عدد من اجهزة الكمبيوتر- تشطيب للبعض الانشائات -تواجد الشباب ومشركتهم بصفه مستمره)

* لو كنت مديرا للمنتدى من تختار ليكون نائبك ؟
انا هاختار اثنين اسامه-شتيوى
لان هما قدها فعلا

ومن تختار ليكونوا مشرفون للأقسام؟
بصراحه اللى موجودين مناسبين فى اماكنهم بس هايكون فيه اضافات وكل واحد يكون مشرف على حاجه واحده او اتنين بالاكثر
يعنى هاضيف
السيد موسى لقسم الغه العربيه فقط-الاستاذ ابراهيم-الاستاذ احمد سالم-
دول ممكن يقدمو اكتر وهايكونو اضافه جيده جدا بصراحه

* أريد تقييم للمنتدى من ناحية الأعضاء والموضوعات والردود؟
رضا نزيه كتب موضوع عجبنى جدا
فعلا لابد من عدم المجامله والردود الغير نابعه بالاقناع بالموضوع

اعتقد ده اللى فى المنتدى ممكن يلاحظ فقط

بس احب اقولك حاجه ياحماده ولجميع الاعضاء وللبلد كلها
انا من اوائل الناس اللى تحمسو للفكره وعلى المستوى الشخصى مقتنع بيه انه حاجه كويسه الناس كلها معجبه بيها
وهاتفضل موجوده الى الابد باذن الله
لان ان شاء الله هايكون ليه اهداف تانيه اكثر من اللى بيقدمها دلوقتى
وان شاء الله هايطور ونطور بيه البلد ونخدم بيه البلد وان شاء الله هانكون ايد واحده وروح واحده جوه المنتدى وبره المنتدى
وان شاء الله هانفذ اشياء متعلقه بالمنتدى فى البلد والناس كلها تعرف ان الافراد القليلون فى المنتدى قدمو ايه للبلد
وربنا يعنا على ده

بشكرك على الاسئله دى يا حماده
وانا والله جوبت بكل صدق
وبالا انا حاسه ومقتنع بيه

هاتيجى امتى
وحشتنا

الحمد لله
كانت تجربه جميله جدا والله وكان شعور مختلف وانا قاعد على الكرسى

واستفدت منها والله كتير
وكانت بتذكرنى باشياء جميله فى حياتى ويارب تكون الناس عرفتنى عن قرب اكثر
وانا بجد والله جوبت بكل صدق وبصراحه

ويارب تستمتعو بالعضو الا هايقعد بعدى

بشكر كل من ساهم معى فى الكرسى وكل من لم يساهم

والحمد لله على كل شئ

» ضيف الاسبوع الرابع لكرسى الاعتراف المهندس / شريف حسن مجاهد
» ضيف الاسبوع الاول لكرسى الاعتراف "محمد رفعت" (مدير المنتدى)
» ضيف الاسبوع الخامس لكرسي الاعتراف الاستاذ ابراهيم حامد(رامبو)
» ضيف الاسبوع السابع لكرسي الاعتراف أ(احمد الشيخه)
» ضيف الاسبوع التاسع لكرسى الإعتراف أ:"رضا عرفات"

فعـاليات يوم الوفـــــاء بالجوابــــــر

ضيف الاسبوع الثالث لكرسى الاعتراف . الاستاذ احمد عرفات