بتحلم بإيه للجوابر ؟

أخوانى وأحبائى أعضاء منتدى روح واحدة
أخوانى وأحبائى شباب الجوابر

أكيد كل واحد فينا بيحلم وكل واحد ليه أهداف وأحلام نفسه يحققها

انا هاكلمكوا النهارده عن
انت بتحلم بإيه يكون فى بلدك
أو بمعنى تانى : نفس بلدك تكون عاملة أزاى وصورتها تكون إيه ؟
انا قصدى ببلدنا هنا مش مصر كلها
لا انا هابدأ بمدينتى أو قريتى الأول وبعدين
لو مدينتى أو قريتى حققت فيها أحلامى
أكيد بإذن الله هاتكون مصر كلها جميلة بإذن الله
###################

أنا بطرح سؤال لكل واحد فينا
نفسك فى إيه يكون موجود فى الجوابر ؟
وتتمنى البلد تكون عاملة أزاى ؟
وتقترح إيه يكون فى مصلحة البلد؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ا
الأحلام هى أساس كل مشروع ناجح
أى شئ فى الدنيا كان حلم وبالعزيمة والإصرار هايتحقق

طبعاً كلنا بنتمنى البلد تكون فى أحسن صورة

ّّّّّّّّّّّّّّّّّّّّّّّّّّّّّّ

مستنى ردودكم وأحلامكم وآرائكم

تقبلوا تحياتى

محمد رفعت

انا نفسى بلدنا كلها تحب بعض وبلاش من التعصب الاعمى سواء لعائلات او لاندية او لاعبين [ندعوك للتسجيل في المنتدى أو التعريف بنفسك لمعاينة هذه الصورة]
ونفسي بلدنا يكون فيها نشاطات ثقافية زى زمان
نفسى النادى يكون مجمع الشباب زى زمان مش الكبارى والقهوة
نفسى النادى يكون فية صالة حديد
نفسي شباب بلدنا يبطلو يقعدو على الكبارى ويجيبو فى سيرة الناس
نفسى نحب بعض من قلبنا ونخاف على بعض واللى يعمل مشروع نشجعة ونتعامل معاة مش نروح نفتح نفس المشروع بلدنا محتاجة لينا كلنا
يلا نطور بلدنا
مشوار الاف ميل خطوة تبدا بطريق

[ندعوك للتسجيل في المنتدى أو التعريف بنفسك لمعاينة هذه الصورة]

موضوع فعلا كلنا محتاجينة مشكور
الاستاذ حمادة رفعت على الموضوع الجميل دة
يلا نطور بلدنا ونقول رأينا
thanksssssssssssssssssssssssssssss
hamada refat

شكرا جزيلاً يا مختار

ونتمنى تحقيق كل أمانيك

يــــــــــــــــــــــــــــــــــــــــارب

وأن شاء الله ربنا يبارك فى الأستاذ حسن فرح
ومجلس إدارة مركز شباب الجوابر
على تطوير مركز الشباب

مشكوووووووووووووووورحماده على الموضوع الجميل ده

شكرا ليك يامحمد على مرورك
بس كنا محتاجين رأيك

بحلم ان بلدى ترجع زى زمان مرفوعة الراس فى العلالى وربنا يهدى كل من فيها رجال ونساء وشباب وفتيات وصغار ودا الاهم واهم حلم ان القران يرجع فيها زى الاول لانه الايام دى تقريبا ضايع بعد ما كانت الجوابر مصنفة فى حفظ القران رجعنا للاسوء وشكرا جزيلا لصاحب الموضوع

بحلم ان ابو يوسف يلعب كورة بدل الكراتيه وحسن ابو تريكة يشجع الزمالك والشلة اياها تتلهى فى حاجة تنفع احسن

انا نفسى فى حاجات كتير قوى
نتعلم اذاى يبقى قلبنا على قلب بعض اذاى نوصل ان كل واحد يرضى بالا قسمه ليه ربنا وما يبصش لغيره عمل ايه ومعملش ايه وحاجه تانيه انا بحلم بيها ونفسى تتحقق ان يبقى فيه شغل هنا لكل واحد وميتغربش لان الغربه بتفرق اعز الناس لبعض وليها ضريبه لازم تدفع وانت ياحماده من الناس الا تحس بده اخوك احمدعرفات
( مفتقدينك)

موضوعك اكثر من رائع يا حمادة

وانا بحلم ان اى مشروع اقتصادى يتعمل فى البلد يكون اى شخص هيعمل المشروع ده واثق انه ان شاءالله ربنا هيكرمه فيه مش يخاف من فشله عندك بلدنا محتاجة مثلا مكتبه فيها اله تصوير ومحتاجة مركز مبيعات وصيانة كمبيوتر الكلام ده كله مش صعب ودى حاجات بسيطة جدا وعلى الرغم من كده الناس خايفة من العواقب وهى الفشل فى نجاح المشروع وعندك حلم تانى ان الشباب يرجعوا يكون مقرهم مركز الشباب تانى زى الاول وحلم ثالث ان الملعب الكبير يرجع زى الاول والملعب الخماسى يتنقل الى اى مكان اخر ويكون على درجة عاليه من الكفاءة وان يكون فيه وعى عند الناس

تقبل مرورى ولك منى خالص الحب والتقدير

[ندعوك للتسجيل في المنتدى أو التعريف بنفسك لمعاينة هذه الصورة]

ربنا يرجع لينا حبايبنا كلهم ويرزقهم فى غربتهم بالرزق الحلال
ونلعب ماتش ويكون على سكة القطر
ونروح يوم دمياط ومانخدش بركات

ممكن احنا اللى ف البلد نسجل اخبار البلد فى القسم المختص وحبايبنا اللى ف ا لخارج يدخلو يقراوها
والله اعلم يمكن انت ولا انا نسافر يبقى حتى نلاقى اللى عايزينه ف المنتدى

ياجماعة الحمد لله ان المنتدى فيه مجموعة حلوة اوى
والمجموعة دى قادرة ان المنتدى يكون قادر يعمل حاجة ف البلد
بمناسبة لكلام دا احنا معانا عضوين ف النادى هنا فى المنتدى ممكن يوصلوا صوتتا لادارة النادى
الشتاء بدا وفيه افراح جيه ليه مايتعملش قاعة ف النادى زى م سلسيل او الرياض

رداً على الصديق العزيز : البراء

بحلم ان بلدى ترجع زى زمان مرفوعة الراس فى العلالى وربنا يهدى كل من فيها رجال ونساء وشباب وفتيات وصغار ودا الاهم واهم حلم ان القران يرجع فيها زى الاول لانه الايام دى تقريبا ضايع بعد ما كانت الجوابر مصنفة فى حفظ القران رجعنا للاسوء وشكرا جزيلا لصاحب الموضوع

أولاً : أشكرك ياأحمد بتفضلك بالرد على هذا الموضوع

ثانياً : طبعا الجوابر كانت تشتهر بحفظ القرآن وكان بها أعلى نسبة من حافظى القرآن الكريم ولكن هذا الزمن ولى عهده
لعدة أسباب :
- عدم إهتمام أولياء الأمور بتحفيظ ابنائهم القرآن الكريم
-وجود خلل فى تربية الأبناء وعدم تربية الأبناء على الأخلاق والقيم
-البيئة المحيطة بالأبناء (المجتمع) أصبحت مختلفة
-لن أتكلم عن الظروف الإقتصادية لأن الموضوع بسيط جدا أى مايعادل 2كيلو من الفاكهة

ولكن انا أضم صوتى لصوتك وأدعو الله ان يحقق هذا الحلم
وأن يعم الخير والرخاء للجوابر وان يهدى شبابنا وفتياتنا وكل أهل الجوابر

أما بالنسبة للحلم الأخير فده مش حلم ده كابوس

مشكوووووووور
تقبل تحياتى

رداً على الصديق العزيز : أحمد عرفات

انا نفسى فى حاجات كتير قوى
نتعلم اذاى يبقى قلبنا على قلب بعض اذاى نوصل ان كل واحد يرضى بالا قسمه ليه ربنا وما يبصش لغيره عمل ايه ومعملش ايه وحاجه تانيه انا بحلم بيها ونفسى تتحقق ان يبقى فيه شغل هنا لكل واحد وميتغربش لان الغربه بتفرق اعز الناس لبعض وليها ضريبه لازم تدفع وانت ياحماده من الناس الا تحس بده اخوك احمدعرفات
( مفتقدينك)

حلمك ده يعتبر حلم مهم ياأحمد لأنه لو صلح حال الناس صلُح حال الأمة
وكلنا شايفين الأوضاع عاملة أزاى دلوقتى

وده مرتبط بأمراض القلب
وليست أمراض القلب هى أمراض عضوية وإنما أمراض نفسية وضعف فى الإيمان

أما مشكلة الوظائف دى فهى مشكلة عامة فى كل مصر
وطبعا كل واحد مكتوب له رزقه فى مكان هايلاقيه
وربنا يرزق كل واحد الرزق الحلال

ومتشكر جدا ياأحمد على شعورك الجميل ده ياأحمد
وبجد أنا والله اللى مفتقدكم كتير جدا
بس ربنا يجمعنا على خير

مع خالص حبى وتقديرى

رداً على الصديق العزيز أسامة

طبعأ ياسمسم المشاريع الإقتصادية لا بد منها فى أى مجنمع ودا طبعاً حسب حاجات البلد
لكن لابد أن يكون هناك أقبال ودعم - لكى يتطور المشروع

- بخصوص مركزالشباب فهذا يتعلق بثلاث محاور أساسية
أولاً : مركز الشباب :- لابد وان يكون مهيئاً تهيئة تامة لممارسة الأنشطة الرياضية فى جو صحى سليم
وان تتوفر به كل الأجهزة والادوات اللازمة للنشاط الرياضى

ثانياً:مجلس إدارة مركز الشباب :- ينبغى على مجلس الإدارة أن يتابع ويشرف على كل الأنشطة الخاصة بمركز الشباب إشرافاً تاماً من خلال تذليل كل الصعوبات وحل جميع المشاكل التى تعوق ممارسة الأنشطة المختلفة
وكذلك تلبية طلبات الشباب فى حدود الميزانيات المتوفرة والمناسبة لمركز الشباب

ثالثاً : دور الشباب :- يجب على أعضاء مركز الشباب التفاعل الإيجابى فى الانشطة المختلفة وأيضا المحافظة على الصورة السليمة لمركز الشباب فى حدود الإحترام والسلوك القويم لأن أساس الرياضة هو الروح الرياضية

:::::::::::::::::::::::::::::::::::::::::

طبعاً كلنا بنحلم بملعب مناسب لممارسة كرة القدم بصورة قانونية وربنا ييسر لمجلس الأدارة الحالى توفير ملعب كرة قدم والذى من واجبنا لهم كشباب أن نكن لهم كل الأحترام والتقدير

خالص شكرى وتقديرى لك ياأسامة
وتمنياتى لك بالتوفيق إن شاء الله
Hamada Refa`at

رداً على الصديق أحمد شتيوى

ربنا يرجع لينا حبايبنا كلهم ويرزقهم فى غربتهم بالرزق الحلال
ونلعب ماتش ويكون على سكة القطر
ونروح يوم دمياط ومانخدش بركات

ممكن احنا اللى ف البلد نسجل اخبار البلد فى القسم المختص وحبايبنا اللى ف ا لخارج يدخلو يقراوها
والله اعلم يمكن انت ولا انا نسافر يبقى حتى نلاقى اللى عايزينه ف المنتدى

ياجماعة الحمد لله ان المنتدى فيه مجموعة حلوة اوى
والمجموعة دى قادرة ان المنتدى يكون قادر يعمل حاجة ف البلد
بمناسبة لكلام دا احنا معانا عضوين ف النادى هنا فى المنتدى ممكن يوصلوا صوتتا لادارة النادى
الشتاء بدا وفيه افراح جيه ليه مايتعملش قاعة ف النادى زى م سلسيل او الرياض

كل الشكر والتقدير ليك يااحمد على مشاركتك الجميلة دى
وربنا يرجعنا أحنا كمان لحبايبنا اللى أحنا بعدنا عنهم
وربنا يرجعنا بالسلامة

طلب بسيط بس من الأصدقاء المقيمين بالبلد بمتابعة آخر الأخبار والمستجدات فى البلد وموالاتنا بها فى المنتدى لكى يزيد التواصل بين المغتربين وما هوجديد فى البلد
هاتجربوا الكلام ده لما تسافروا
ولكنى أتمنى لكم أن يرزقكم الله رزقاً حلالا مباركا فى بلدكم

البلد محتاجة حاجات كتير أوى
وممكن مجرد حلم صغير ننقلة للمسئولين ونعرض عليهم الفكرة وتكون حيز التنفيذ

مشكووووور ياأحمد
وتقبل منى كل الشكر والتقدير

يارب كل شباب الجوابر يحققوا احلامهم ودائما الى الاحسن

كل الشكر والتقدير لكل من ساهم بالرد على هذا الموضوع وأتمنى تحقيق كل الأمنيات والأحلام لشباب الجوابر
ولكن لى ملاحظة بسيطة هى ان أغلب الأعضاء تنحصر أحلامهم فى مركز الشباب
أنا أوافقكم هذا الرأى
لأن مركز الشباب لم يعد بالمستوى الذى كان عليه من قبل لأسباب مختلفة نتطرق إليها بالحديث والمناقشة لاحقاً

ولكن هناك أحلاماً وآمالاً يجب ان نفكر فيها ونتمنى وجودها فى الجوابر
ومن خلال تخيلى لما تحتاجه البلد فى المستقبل

- ردم الترعة بطول الطريق وإستغلالها إستغلالاً سليما من خلال إنشاء حدائق أو أى مشروع أو توفير مساحة مجهزة للسوق تكون مجهزة بصورة تدعو للرقى الحضارى
-تجميل مدخل البلد من خلال عمل نافورة أو مدخل راقى يليق بإسم البلد
-وجود صالة أفراح فى البلد تخدم أهل البلد والمدن والقرى المجاورة
-زيادة فاعلية وتطوير مستشفى الجوابر وتحسين مستوى الخدمة
-تزويد البلد بعربات القمامة الحديثة وتوزيعها تبعاً للكثافة السكانية

هذا بعضا مما تخيلته وليس كل ماتخيلته أرجو منكم أن تشاركونى ونتبادل الآراء فى ماينقص الجوابر

مرة ثانية أشكركم كل الشكر على تشريفكم هذا الموضوع

خالص تحياتى وتقديرى
Hamada Refa`t

بجد موضوعاتك بتكون جامدة ياحمادة وبثير الانتباه بلينا وبتخلى الواحد غصب عنو يكتب رد

الحجات اللى انت ذكرتها فوق مهمة للبلد

بس انا بقول احنا فكرنا فى النادى فقط لانا محتاجينه اكتر
بس اللى انت قلته دا هوا الاهم بلد جميلة تشجع الواحد

وياريت ياحمادة تعمل موضوع خاص بالنادى

شكرا على مرورك العذب وكلماتك الرائعة

أنا معاك ياأحمد
موضوع مركز الشباب ده موضوع مهم وكل فرد فى الجوابر مايقدرش يستغنى عنه كل وكلنا إن شاء الله نستفيد منه

بس لازم يكون فيه تبادل للحوار بين أعضاء مركز الشباب وأعضاء مجلس الأدارة
علينا أولا أن نجدد الثقة فى مجلس الأدارة

لكى نحصل على مطالبنا على أكمل وجه

بحلم بكل خير للبلد الجميلة والجماعة الافاضل اللى في المنتدي وبحلم ان كل بلد مصري يكون مُشَرَّف
وسلامي ليكو كلكم )

أشكرك يااحمد على مشاركتك فى الحلم وتواجدك فى الموضوع

واهلا بيك فى المنتدى

بسم الله الرحمن الرحيم
اولا سلامى لمحمد
واسف اتاخرت فى الرد بس الواحد نفسه فى حاجات بسيطه
اولا الحاجه الموجوده نستخدمها يا نشيلها المكتبه والنادى النسائى
وبعدين الاحزاب ملهاش حل حز ب مع الخطيب و حز ب مع الامام وحز ب معارضه ملهوش فى حاجه مش عارف المهم نبطل فتى ونخلص صلاة الجمعه ونسمعش حاجه والقمامه نفسى اشوفها بتترمى فى الصندوق لازم خريطه بره العربيه
واللى ليه فى حاجه يتكلم واللى مالوش يسكت نبطل فتى شويه بس ده المصرى اساسا نيجى للجد ونبطل تهريج

1_ نفتح مول 2
_مدرسه اعدادى وثانوى مشتركه
3_ومصنع غزل ونسيج يلمنا بدل الخلاطه
4_ النادى يبقى ليه لزمه
وكل سنه وانت طيب يا تريكه الاصلى واسف على التاخير مره تانيه وادعيلى
الشيخه

الله يسلمك يااحمد
ولا يهمك ع التأخير
وشكا جزيلاً على كلماتك ومشاركتك الجميلة

بالنسبة للمكتبة فعلا مش مستخدمة ممكن تكون فى أسباب كتير منها مكانها البعيد وأيضا أحنا السبب أيضا فى عدم التردد عليها
والأسباب كتير

والأحزاب دى زادت جدا فى الفترة الأخيرة بس مسيرها تروح لحالها

وزى ماتكرمت وقلت البلد محتاجة مدرسة إعدادية
ويارب تتحقق كل الأحلام اللى نفسك فيها
وربنا يكرمك يااحمد
ويوفقك للخير ويرزقك رزق حلال

خالص تحياتى
حماده رفعت

ازيك ياحماده علي فكره انا اول واحد رديت علي الموضوع ده واتفاجئت لما مريت تاني ولقيت ردي محذوف
واحب اضيف حاجه تانيه وهي ان البلد دي راحت في سكه صعب ترجع من تاني لاصلها يمكن اكون متشائم بس دي الحقيقه ودا بسبب الطمع اللي ملئ قلوب الناس مابقاش حد ممكن يسامح حد ولا حد ممكن يخدم حد خدمه ويقول عشان انت ابن بلدي بس الخدمه مقابل فلوس ودا الاساس في البعد والكره اللي ملي البلد بس لازم عشان نقوم وننجح كل واحد يكون مميز في عمله ولازم يكون ليه سمعته واسمه في مجاله فمثلا ليه كل الناس اللي بره البلد من ميت سلسيل او البلاد اللي حولينا متجيش لعرفات عشان يصلح لهم تليفون بس لازم يكون مميز وليه تقله وقتها وليه ميكونش كل الصنايعيه بتوع البلد معروفين علي مستوي البلاد اللي حولينا ويتطلبوا بالاسم بس لازم يكونو مميزين لان بلدنا فلوسها بتطلع بره ونفسي البلد يدخلها فلوس من البلاد اللي جمبنا
معلش انا طولت عليكم ولكن في النهايه لابد ان اشكر صاحب الموضوع
وربنا يجمع الشمل مره تانيه
وتقبل تحياتي بوافر التقدير والاحترام
محمد يوسف

]أهلا بيك يابو يوسف
ردك محدش حذفه ولا حاجة ؟؟؟
ولا يهمك يا محمد
ومشكور على مشاركتك الغاليةدى
ونتمنى كل أحلامك تتحقق
وربنا يسهل ونودى عرفات ياخد دورة فى أمريكا
وربنا يصلح حال الجميع
كل الشكر والتقدير
حمادة رفعت

» اسماء مالكي القنوات الفضائيه
» اللقاء المفتوح فى يوم الوفاء بالجوابر يقوم به المستشار البترولى المهندس/ صلاح أبراهيم الدسوقى علوان
» توصية من توصيات لقاء يوم الوفاء للجوابر
» توصيات لقاء يوم الوفاء الأول للجوابر

فعـاليات يوم الوفـــــاء بالجوابــــــر

بتحلم بإيه للجوابر ؟